Dövlət məktəblərində xarici dildə təhsil almaq istəyənlərin NƏZƏRİNƏ

Dövlət ümumi təhsil müəssisələrində dövlət standartları əsasında digər dildə təhsil almaq istəyən şagirdlərin həmin tədris dili üzrə müsahibədən keçirilməsi qaydası təsdiqlənib.

Gundem.today "Trend"ə istinadla xəbər verir ki, qaydalarda V-VII siniflər üzrə müsahibənin hansı meyarlar əsasında qiymətləndiriləcəyi də öz əksini tapıb.

Belə ki, V-VII siniflər üzrə müsahibə zamanı şagirdin tədris dilini bilmə səviyyəsi aşağıdakı meyarlar əsasında qiymətləndiriləcək:

Şagird mətni dinləyərkən əsas faktları və fikirləri qeyd edərək ümumiləşdirməli, dinlədiyi mətni mövzu, məzmun, struktur və ideya baxımından şərh etməli, dinlədiyi mətndəki obraz, hadisə və fikirlərə münasibət bildirməli və əsaslandırmalıdır.

Şagird mətni oxuyarkən müvafiq səs tonu seçməli, mətndəki məlumatları və onların ardıcıllığını müəyyənləşdirməli, kontekstdən çıxış edərək mətndə tanış olmayan söz və ifadələrin mənasını, faktlar və hadisələr arasındakı əlaqəni müəyyən etməli, müxtəlif mətnləri mövzu, məzmun-struktur, ideya baxımından müqayisə etməli və yaradıcı yanaşmalıdır.

Şagird müzakirə və debatlarda tolerantlıq nümayiş etdirməli və danışanın fikrinə rəy bildirməli, şəkil və qrafik informasiya üzrə mətn qurub nəql etməli, şifahi nitqində yeni öyrəndiyi sözlərdən kontekstə uyğun istifadə etməli, danışarkən səs tonunu tənzimləməli, pauza və məntiqi vurğudan, intonasiya, jest və mimikadan istifadə etməlidir.

Şagird yazısında fikir və məlumatların ardıcıllığına (xronoloji, qeyri-xronoloji, səbəb-nəticə) riayət etməli, yazısında ədəbi dilin normalarına əməl etməlidir.

Qeyd edək ki, Komissiya üzvlərinin verdiyi ümumi ballar toplanılır və komissiya üzvlərinin sayına bölünərək yekun bal müəyyən edilir. Müsahibədən 12 və daha çox bal toplamış şagird müsahibədən müvəffəqiyyətlə keçmiş hesab olunur. Müsahibənin nəticəsi onun keçirildiyi tarixdən beş iş günü müddətində elektron kabinetə göndərilir.

Xəbər maraqlı gəlib? Sosial şəbəkələrdə paylaşın