Mütəxəssislər telefonları buzla soyutmağın fəsadları barədə xəbərdarlıq ediblər

"Google Pixel" smartfonu sahiblərinə cihazlarını həddindən artıq isinmədən qorumaq üçün onları buza qoymaq tövsiyə edilib.

Gundem.today xəbər verir ki, bu barədə "Android Authority" nəşri məlumat yayıb.

Yazın əvvəlində "Pixel 8 Pro" modellərinin sahibləri "Wi-Fi" və "Bluetooth" bağlantılarında yaranan nasazlıqlardan şikayət etməyə başlayıblar. Ehtimal olunur ki, qadcetlər məhz həddindən artıq isinmə səbəbindən şəbəkəni itirir. Bu texniki çətinliklərin mart ayında təqdim olunan "Pixel Feature Drop" yenilənməsindən sonra özünü büruzə verdiyi bildirilir.

"Reddit" platformasında "danillll2017" ləqəbli istifadəçi digər şikayətləri bir araya toplayaraq maraqlı təklif irəli sürüb. O, cihazın isinməsinin qarşısını almaq üçün telefonu söndürməyi və üzərinə buz paketi qoymağı məsləhət görüb. İstifadəçinin sınağına əsasən, belə bir soyutmadan sonra telefon növbəti isinməyədək simsiz şəbəkələrlə yenidən problemsiz işləyir.

"Android Authority" mütəxəssisləri isə cihazları bu üsulla soyutmaqdan çəkinməyi tövsiyə ediblər:

"Bunu sınaqdan keçirməyi məsləhət görmürük. Çünki zaman keçdikcə cihazın rütubətdən qorunma xüsusiyyətləri zəifləyir və siz kamera obyektivində kondensat (rütubət damcıları) yaranma riskini artırırsınız".

Mütəxəssislər istifadəçilərə bu təhlükəli üsullardan qaçmağı və problemi kökündən həll edəcək rəsmi "Google" yenilənməsini gözləməyi məsləhət görüblər.

Xəbər maraqlı gəlib? Sosial şəbəkələrdə paylaşın