Pivə zavodundan Xəzər dənizinə çirkab axıdılması iddialarına rəsmi cavab: "İstehsal çoxdan dayanıb" - VİDEO

"Bakının Xətai rayonu ərazisində yerləşən pivə zavodunun çirkab sularını birbaşa Xəzər dənizinə axıtması ilə bağlı iddialar əsassızdır".

Bu barədə Gundem.today-ın sorğusuna cavab olaraq "Alko LMD Azər Spirt 2024" Məhdud Məsuliyyətli Cəmiyyətindən (MMC) məlumat verilib.

Qeyd olunub ki, müəssisənin ətrafında müşahidə olunan çirkab suların zavodun fəaliyyəti ilə heç bir əlaqəsi yoxdur.

"Zavodda uzun müddətdir istehsal prosesi dayandırılıb və hazırda əraziyə, yaxud ətraf mühitə heç bir istehsal tullantısı axıdılmır. Ümumiyyətlə, müəssisə fəaliyyət göstərdiyi illər ərzində kimyəvi qatqılı təhlükəli tullantıların ətraf mühitə atılmasından söhbət belə gedə bilməz. Hazırda müəssisədə istehsal prosesi həyata keçirilmədiyindən orada yalnız mühafizə xidməti fəaliyyət göstərir. Bu səbəbdən ərazidə müşahidə olunan çirkab suların müəssisənin fəaliyyəti ilə əlaqələndirilməsi tamamilə əsassızdır", - deyə açıqlamada bildirilir.

Bakının Xətai rayonu ərazisində yerləşən pivə zavodu çirkab suları birbaşa Xəzər dənizinə axıdır.

Gundem.today xəbər verir ki, bununla bağlı videogörüntü yayımlanıb.

Bildirilib ki, axıdılan zəhərli maddə hektarlarla ərazidə suda yaşayan canlıların məhvinə səbəb olur.

"Külli miqdarda balıqlar zəhərlənir, insan sağlamlığı üçün ciddi təhlükə yaradır", - deyə şikayətdə bildirilir.

Gundem.today-ın sorğusuna cavab olaraq Suların İstifadəsinə və Mühafizəsinə Dövlət Nəzarəti Xidmətindən bildirilib ki, axıdılan kəskin qoxulu qırmızımtıl-qonur rəngli tullantı sularının laboratoriya sınaqları aparılıb.

"Xidmətimizin əməkdaşları tərəfindən 2026-cı il mayın 8-də keçirilən nəzarət tədbirləri zamanı Bakı şəhəri, Xətai rayonu, Pivəzavod küçəsi ünvanında fəaliyyət göstərən "Alko LMD Azər Spirt 2024" Məhdud Məsuliyyətli Cəmiyyətinə (MMC) məxsus spirtli içkilərin istehsalı zavodunda formalaşan tullantı sularının əvvəlcə açıq axarla, daha sonra isə diametri 300 mm olan yeraltı plastik boru xətti ilə Xəzər dənizi istiqamətində axıdıldığı müəyyən edilib.

Axıdılan kəskin qoxulu qırmızımtıl-qonur rəngli tullantı sularının tərkibinin müəyyən olunması məqsədilə götürülmüş su nümunələrinin laboratoriya sınaqları aparılıb. Laborator analiz nəticələrinə əsasən, su nümunələrində asılı maddələrin, oksigenə kimyəvi tələbatın (OKT), oksigenə bioloji tələbatın (OBT5) və ammoniumun miqdarının yol verilən qatılıq həddindən dəfələrlə yüksək olduğu üzə çıxıb.

Qeyd etmək istəyirik ki, tullantı sularının tərkibində OBT5, OKT və asılı maddələrin miqdarının normadan artıq olması Xəzər dənizi ekosisteminə və su bioresurslarına ciddi mənfi təsir göstərir. Belə ki, OBT5 və OKT göstəricilərinin yüksək dərəcəsi suda çoxlu üzvi və kimyəvi çirkləndiricinin olduğunu göstərir ki, bu maddələrin parçalanması suda həll olmuş oksigenin sürətlə azalmasına və nəticədə su canlılarının oksigen çatışmazlığından məhvinə səbəb ola bilər. Eyni zamanda, asılı maddələrin çox olması günəş işığının suyun dərin qatlarına keçməsini məhdudlaşdırır, fotosintezi zəiflədir, dib canlılarının üzərini örtərək onların məhvolma riskini artırır.

Aşkar edilmiş faktlara əsasən, Azərbaycan Respublikasının Su Məcəlləsinin, "Su təchizatı və tullantı suları haqqında" Azərbaycan Respublikası Qanununun, Azərbaycan Respublikasının Nazirlər Kabinetinin 16 sentyabr 1999-cu il tarixli 146 saylı Qərarı ilə təsdiq edilmiş "Balıqçılıq su obyektlərinə zərərli təsirlərin yol verilən normaları"nın tələblərinin pozulduğu müəyyən edilib.

Bu da öz növbəsində, dəniz ətraf mühitini quruda olan mənbələrdən çirkləndirməklə insan sağlamlığı və dənizin canlı sərvətləri üçün zərərli olan, yaxud dənizdən qanuni istifadəyə mane olan maddələri və ya materialları tullama qaydalarını pozmaqla dəniz ətraf mühitini çirkləndirməklə Azərbaycan Respublikasının Cinayət Məcəlləsinin 252.1-ci, eyni zamanda, yerüstü və ya yeraltı suların, istifadə olunan su mənbələrinin çirkləndirilməsi, tükənməsi və ya onların təbii xassələrinin başqa cür dəyişdirilməsi, balıq və digər su bioresurslarına əhəmiyyətli zərərin vurulması ilə Azərbaycan Respublikasının Cinayət Məcəlləsinin 250.1-ci maddəsinin tələbinə əsasən cinayət tərkibinin əlamətləri olduğundan iş üzrə toplanmış materiallar pozuntunun qarşısının alınması və məsələyə hüquqi qiymət verilməsi üçün Azərbaycan Respublikası Daxili İşlər Nazirliyinin Nəqliyyatda Baş Polis İdarəsinin Su Nəqliyyatında Polis İdarəsinə göndərilib.

Xəbər maraqlı gəlib? Sosial şəbəkələrdə paylaşın