Tramp ABŞ-nin ədliyyə naziri postuna Blanşın təsdiqlənməsini təklif etdi

ABŞ Prezidenti Donald Tramp Konqresin Senatına hazırda Ədliyyə Nazirliyinin rəhbəri (ABŞ Baş prokuroru) vəzifəsini icra edən Todd Blanşın həmin posta təsdiqlənməsini təklif edib.

Gundem.today xəbər verir ki, bununla bağlı müvafiq bəyanat Ağ Evin rəsmi internet səhifəsində yerləşdirilib.

ABŞ-də baş prokurorluq funksiyalarını həyata keçirən Ədliyyə Nazirliyinin rəhbəri vəzifəsinə T.Blanşın namizədliyi artıq Senata təqdim olunub. Namizədin bu vəzifəyə təsdiqlənməsi üçün əvvəlcə Senatın Hüquq komitəsinin, ardınca isə ABŞ Konqresinin yuxarı palatasının tam tərkibinin dəstəyi tələb olunur.

Xatırladaq ki, Tramp aprelin 2-də Pem Bondinin istefasını qəbul etdikdən sonra Blanşı ABŞ Ədliyyə Nazirliyinin rəhbəri əvəzi təyin edib. "The New York Times" nəşrinin yaydığı məlumata görə, Bondinin vəzifədən getməsinin əsas səbəbi pedofiliyada ittiham olunan maliyyəçi Ceffri Epşteynin cinayət işi üzrə sənədlərin yayımlanması fonunda atdığı addımlar olub.

Xəbər maraqlı gəlib? Sosial şəbəkələrdə paylaşın