Tramp Netanyahuya Livana hücumlarla bağlı məsləhətlər verib

Amerika Birləşmiş Ştatlarının Prezidenti Donald Tramp İsrailin Baş naziri Benyamin Netanyahuya müraciət edərək Livanda ancaq hədəfli hücumlar həyata keçirməyi məsləhət görüb.

Gundem.today-ın məlumatına görə, Ağ Ev rəhbəri bu barədə "Axios" portalına müsahibəsi zamanı danışıb.

"Mən Netanyahuya fəaliyyətini daha da hədəflənmiş şəkildə qurmalı olduğunu söylədim. Binaları məhv etmək olmaz. O buna yol verə bilməz. Belə hallar çox qorxuncdur və İsrailin imicinə xələl gətirir", - deyə Ağ Ev lideri bildirib.

O, Livanı və ölkə rəhbərliyini bəyəndiyini xüsusi diqqətə çatdırıb. ABŞ prezidenti, həmçinin hesab edir ki, Tehranla bağlı əməliyyatlar başa çatdıqdan sonra bu dövlət yenidən dirçələ bilər.

"İran Livanı viran etdi. Onların oyuncağı olan "Hizbullah" Livanı dağıtdı. İran məğlub olduqda "Hizbullah" da avtomatik olaraq məğlub ediləcək", - deyə Tramp əlavə edib.

ABŞ-li digər bir rəsmi nəşrlə söhbətində deyib ki, Donald Tramp administrasiyası İsraildən təmkinli olmağı və Livanla yeni diplomatik prosesə şərait yaratmağı xahiş edib.

Xəbər maraqlı gəlib? Sosial şəbəkələrdə paylaşın