300 bal toplayan Zəhra: "Çox yox, sistemli oxumaq lazımdır"

15 mart 2026-cı il tarixində keçirilmiş buraxılış imtahanında maksimum - 300 bal toplayan şagirdlərdən biri də Zəhra Polad qızı Zərbəliyeva olub. O, ən yüksək nəticəyə imza ataraq fərqlənən abituriyentlər sırasında yer alıb.

Zəhra Zərbəliyeva əldə etdiyi uğurla bağlı təəssüratlarını Gundem.today-la bölüşüb.

O bildirib ki, nəticəni öyrəndiyi an onun üçün həm həyəcanlı, həm də unudulmaz olub:

"Çox həyəcanlandım. Müəlliməm və rəfiqəm yanımda idilər. Nəticəyə baxanda bir anlıq inana bilmədim. Sonra hamımız sevinc hissi keçirdik. Ətrafımdakı insanların reaksiyası məni daha da sevindirdi".

Şagird yüksək nəticəyə təsir edən əsas amillərdən danışarkən sistemli hazırlığın vacibliyini xüsusi vurğulayıb.

Onun sözlərinə görə, uğur təsadüf deyil, düzgün planlaşdırılmış rejimin nəticəsidir:

"Orta hesabla gündə 3-4 saat dərs oxuyurdum. Əsas məsələ sistemli olmaqdır. Sadəcə, çox oxumaq yox, düzgün və planlı şəkildə oxumaq lazımdır. Düşünürəm ki, şagird həm dərslərinə, həm də istirahətinə vaxt ayırmalıdır. Bu balans qorunanda nəticə daha yaxşı olur".

Z.Zərbəliyeva qeyd edib ki, yüksək nəticə əldə etmək üçün erkən mərhələdən məqsəd müəyyənləşdirmək mühüm rol oynayır:

"Əvvəldən məqsəd qoymaq vacibdir. Mən birinci sinifdən bütün fənləri yaxşı oxumuşam, həmişə əlaçı olmuşam. Bu da sonrakı nəticələrimə təsir edib. Qırmızı attestatım var".

Gələcək planlarından danışan Zəhra informasiya texnologiyaları sahəsində təhsil almaq istədiyini bildirib. O, bu sahədə özünü inkişaf etdirərək uğurlu mütəxəssis olmağı hədəflədiyini deyib.

Şagird qəbul imtahanı ilə bağlı gözləntilərini də bölüşüb:

"İnşallah, qəbul imtahanında da yüksək nəticə göstərərək 350-dən yuxarı bal toplamağı hədəfləyirəm".

Xəbər maraqlı gəlib? Sosial şəbəkələrdə paylaşın