"Azadlıq layihəsi" əməliyyatını dayandırmağı Trampdan kim xahiş edib?

Pakistan ABŞ-dən İranla danışıqlar dövründə hərbi münaqişə səbəbindən Hörmüz boğazında qalan gəmilərlə bağlı "Azadlıq layihəsi" əməliyyatını dayandırmağı xahiş edib.

Gundem.today TASS-a istinadən xəbər verir ki, bunu ABŞ lideri Donald Tramp bildirib.

"Pakistan və ölkənin liderləri əla iş gördülər. Onlar bizdən danışıqlar zamanı bunu həyata keçirməməyi xahiş etdilər", - deyə Tramp jurnalistlərlə söhbətində diqqətə çatdırıb.

ABŞ lideri əlavə edib ki, lazım gələrsə sözügedən əməliyyatı bərpa olunacaq.

Daha əvvəl "The Wall Street Journal" nəşri mənbələrinə istinadən xəbər vermişdi ki, ABŞ prezidenti eskalasiyadan narahatlığını ifadə edən Səudiyyə Ərəbistanının vəliəhd şahzadəsi Məhəmməd bin Salman Əl Səud ilə telefon danışığından sonra "Azadlıq layihəsi"ni dayandırıb.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.

Həmçinin Hörmüz boğazından gəmilərin keçidində ciddi problemlər yaranıb.

Aprelin 8-də Donald Tramp Tehrana verdiyi ultimatumun vaxtının bitməsinə bir neçə saat qalmış Vaşinqtonun ikihəftəlik atəşkəslə razılaşdığını elan edib.

Daha sonra İslamabadda tərəflərin ilk görüşü keçirilib.

Aprelin 22-nə planlaşdırılmış ikinci görüş isə baş tutmayıb.

Xəbər maraqlı gəlib? Sosial şəbəkələrdə paylaşın