Bakıda 727 min manatı qanunsuz leqallaşdıran şəxsə HÖKM OXUNDU

Bakıda banklardan birindən cinayət yolu ilə 727 min manatdan çox pul vəsaitini qanunsuz leqallaşdırmaqda təqsirləndirilən Vaysero Aleksandr Vladimiroviçin məhkəməsi yekunlaşıb.

Gundem.today-ın məlumatına görə, Bakı Ağır Cinayətlər Məhkəməsinin hakimi Namiq Kərimovun sədrliyi ilə keçirilən prosesdə dövlət ittihamçısı Tural Yaqubov ittiham nitqi ilə çıxış edib.

Prokuror məhkəməyə təqsirləndirilən şəxsin 5 il müddətinə azadlıqdan məhrum olunmasını təklif edib.

Vəkil müdafiə çıxışı etdikdən sonra təqsirləndirilən şəxs son söz deyib.

Daha sonra ona hökm oxunub, Vaysero Aleksandr Vladimiroviç 4 il müddətinə azadlıqdan məhrum edilib.

İstintaq zamanı müəyyən edilib ki, Vaysero Aleksandr tamah niyyəti ilə qabaqcadan əlbir olan bir qrup şəxs halında cinayət yolu ilə əldə edilmiş xeyli miqdarda əmlakı legallaşdırıb.

Belə ki, Vaysero Aleksandr Vladimiroviç ölkə hüdudlarından kənarda yaradılmış və qanunsuz fəaliyyət göstərən mərc, loto və digər qumar saytlarından daxil olmuş pul vəsaitlərinin həqiqi mənbəyini gizlədərək, onları müxtəlif şəxslərin adına olan bank kartlarına hissə-hissə olmaqla köçürməklə ümumilikdə 727 min 24 manat 40 qəpik məbləğində pul vəsaitini qanunsuz legallaşdırıb.

O, Daxili İşlər Nazirliyinin (DİN) Kibercinayətkarlıqla Mübarizə Baş İdarəsi tərəfindən tutularaq istintaqa cəlb edilib.

Toplanmış sübutlar əsasında Vaysero Aleksandr Vladimiroviçə Cinayət Məcəlləsinin 193-1.3.2 (cinayət yolu ilə qazanılmış əmlakı leqallaşdırma) maddəsi ilə yekun ittiham verilib.

Elgün Həsənli

Xəbər maraqlı gəlib? Sosial şəbəkələrdə paylaşın