Baş həkim: "Məqsədimiz görünüşü dəyişmək deyil, itirilmiş funksiyanı qaytarmaqdır" - FOTO

"Səhiyyə Nazirliyinin dəstəyi ilə Əziz Əliyev adına Azərbaycan Dövlət Həkimləri Təkmilləşdirmə İnstitutu nəzdində yaradılan yeni Plastik və Rekonstruktiv Cərrahiyyə Klinikasının əsas fəaliyyət istiqaməti ilk növbədə rekonstruktiv (bərpaedici) əməliyyatlardır. Məqsəd yalnız xarici görünüşü dəyişmək deyil, insanın zədələnmiş və ya itirilmiş bədən hissəsini mümkün qədər əvvəlki vəziyyətinə qaytarmaqdır".

Gundem.today xəbər verir ki, bunu Səhiyyə Nazirliyinin rəsmi "Instagram" hesabında keçirilən canlı yayım zamanı sözügedən klinikanın baş həkimi Dilqəm Məmmədov açıqlayıb.

Onun sözlərinə görə, rekonstruktiv əməliyyatlar əsasən qəza və digər travmatik hadisələr nəticəsində alınan xəsarətlərlə bağlı aparılır:

"Alınan travmalar nəticəsində üz, əl və ya bədənin başqa hissəsində deformasiya yaranarsa, həmin nahiyəni yenidən formalaşdırırıq. Yanıq hallarında dəri büzüşə, hərəkət məhdudlaşa bilər. Bu zaman xüsusi əməliyyatlarla həm görünüş, həm də hərəkət funksiyası bərpa olunur. Onkoloji əməliyyatlardan - məsələn, süd vəzi xərçəngi səbəbindən döş götürüldükdən sonra yenidən formalaşdırılması (rekonstruksiya) aparılır ki, pasiyent həm fiziki, həm də psixoloji olaraq özünü daha yaxşı hiss etsin. Anadangəlmə qüsurlar, o cümlədən dodaq-damaq yarığı kimi problemlər əməliyyatla düzəldilir və uşaq normal danışıq, qidalanma funksiyasına qovuşur. Mikrocərrahiyyə əməliyyatları, çox incə damar və sinirlərin bərpası aparılır".

Baş həkim qeyd edib ki, bu əməliyyatların əsas fərqi ondadır ki, onlar yalnız görünüş üçün deyil, insanın normal yaşaması üçün vacibdir.

Bununla yanaşı, klinikamızda estetik əməliyyatlar da geniş şəkildə həyata keçirilir. Bu əməliyyatlar daha çox insanın görünüşündən razı qalması və özünə inamının artması üçün edilir.

D.Məmmədov qeyd edib ki, klinikada ən çox estetik proseslər - burun (rinoplastika), göz qapağı, qarın (abdominoplastika) piylərin götürülməsi (liposaksiya), süd vəzi əməliyyatları aparılır:

"Həmçinin, minimal prosedurlar olan iynə vasitəsilə edilən botoks və dolğularla qırışlar azaldılır və üzə daha təravətli görünüş verilir.

Biz estetik əməliyyatlarda da çalışırıq ki, nəticə təbii görünsün və insanın özünə uyğun olsun. Yəni süni dəyişikliklərdən uzaq dururuq.

Hədəf pasiyent auditoriyamız genişdir - həm sağlamlığını bərpa etmək istəyənlər, həm də görünüşünü yaxşılaşdırmaq istəyən şəxslər bizə müraciət edə bilər. Amma bizim üçün tibbi zərurəti olan rekonstruktiv əməliyyatlar hər zaman daha ön plandadır.

İcbari tibbi sığorta isə əsasən məhz bu cür zəruri rekonstruktiv əməliyyatları əhatə edir. Estetik məqsədli əməliyyatlar isə hazırda bu paketə daxil deyil".

Xəbər maraqlı gəlib? Sosial şəbəkələrdə paylaşın