Dünyanın ən varlı daşınmaz əmlak sahibinin adı açıqlandı

"Zara" brendinin sahibi Amansio Orteqa qlobal miqyasda daşınmaz əmlak sektorunda ən böyük sərvətin sahibinə çevrilib.

Gundem.today-ın məlumatına görə, "Forbes" nəşri bu barədə doqquz ölkədə yayımlanan korporativ sənədlərə, torpaq reyestrlərinə, press-relizlərə, həmçinin "Regrid" və "Real Capital Analytics" daşınmaz əmlak bazalarının məlumatlarına istinadən xəbər verir.

Jurnalistlər Orteqanın daşınmaz əmlak imperiyasının xəritəsini tərtib etmək üçün qeyd olunan göstəriciləri analiz ediblər. Nəşrin qiymətləndirməsinə əsasən, dəyəri 25 milyard dollar olan bu portfel 13 ölkədə 200-dən çox obyekti əhatə edir. Məqalədə vurğulanır ki, bu göstərici onu avstraliyalı Harri Triquboff (23.2 milyard dollar sərvət) və amerikalı Donald Bren (19.2 milyard dollar) kimi ən uğurlu inşaatçılardan daha qiymətli aktivlərə malik olan dünyanın ən böyük daşınmaz əmlak maqnatı edir.

"Forbes" yazır ki, "Zara"nın da daxil olduğu dünyanın ən böyük geyim pərakəndə satıcısı "Inditex" şirkətinin 2001-ci ildə Madrid fond birjasına çıxışından sonra 90 yaşlı Orteqa dünyanın 100-ə yaxın ölkəsində 216 daşınmaz əmlak obyektinə təxminən 24 milyard dollar xərcləyib. Nəşrin məlumatına görə, bu obyektlərin, demək olar ki, hamısı hələ də onun mülkiyyətindədir: o, yalnız on obyekti satıb. Jurnal diqqətə çatdırır ki, iş adamının daşınmaz əmlaka etdiyi yatırımların ümumi həcmi "Amazon"un qurucusu Ceff Bezosun özünün "Blue Origin" kosmik startapına yatırdığı 20 milyard dollarlıq məbləğdən belə çoxdur.

Bildirilir ki, təkcə ötən il ərzində Orteqa səkkiz ölkənin on şəhərində həyata keçirilən mülkiyyət müqavilələrinə 3 milyard dollardan çox vəsait yönəldib. Bu çərçivədə o, yeddi ofis binası, iki hotel, iki sənaye zonası, lüks ticarət mərkəzi, çoxmənzilli yaşayış binası və Böyük Britaniyanın iri liman operatorunun səhmlərinin 49%-ni alıb. Biznesmen eyni zamanda Vankuverdə təqribən 93 000 kvadratmetr ofis sahəsinə malik, bütöv bir şəhər məhəlləsini tutan nəhəng texnoloji mərkəz olan tarixi "Canada Post" binasını da əldə edib. Daha sonra o, həmin məkanı "Amazon"a icarəyə verib. Orteqanın nağd şəkildə 850 milyon dollar ödədiyi bu obyekt Kanadanın tarixində ofis sahələrinin satışı üzrə ən böyük müqavilə olub.

Orteqanın şirkəti ilə işləyən bir broker "Forbes"a açıqlamasında bildirib:

"O, qeyri-məhdud vəsaitə malik olması ilə əksər daşınmaz əmlak investorlarından kəskin şəkildə fərqlənir. Yüksək risk tələb etməyən yatırımları sevir, nəyisə alıb təkmilləşdirməyə çalışmır. O, bazarda öz sinfinin ən yaxşısı olan kolleksiya aktivlərini alır. Bu, bir az ən yüksək səviyyəli sənət əsərlərinin alıcısına bənzəyir".

İspaniyalı iş adamının sərvəti 16 aprel tarixinə "Forbes" tərəfindən 139.3 milyard dollar dəyərində qiymətləndirilir. Nəşrin versiyasına görə, o, dünyanın ən zəngin adamları siyahısında 13-cü yerdə qərarlaşıb.

Xəbər maraqlı gəlib? Sosial şəbəkələrdə paylaşın