Həftəsonu dərsləri problemə çevrilməsin: Psixoloqdan valideynlərə üç vacib məsləhət

Həftəiçi ev tapşırıqlarını yerinə yetirmək uşaqlar üçün adi hal olsa da, istirahət günlərində bu proses tez-tez müqavimətlə qarşılanır. Həm özünüzün, həm də övladınızın həftəsonunu korlamadan onu dərslərini sakitcə yerinə yetirməyə yönləndirməyin üç səmərəli üsulu mövcuddur.

Gundem.today xəbər verir ki, Moskva Təhsil və Elm Departamentinin Şəhər Psixoloji-Pedaqoji Mərkəzinin psixoloqu Yekaterina Nadelyayeva bu barədə "gazeta.ru"ya müsahibəsində danışıb.

Psixoloq qeyd edir ki, təzyiq göstərmək əvəzinə, uşaqla razılığa gəlmək və ona aydın dərs strukturu təklif etmək lazımdır. Budur həmin üç üsul:

1. Tapşırıqları bloklara bölün: Dərslərə asan tapşırıqlardan başlayın. Prosesi 25-50 dəqiqəlik hissələrə bölün və hər blokdan sonra 10-15 dəqiqəlik fasilə verin. Fasilə zamanı uşağın ayağa qalxması və fiziki hərəkət etməsi diqqəti yenidən cəmləməyə kömək edir.

2. Seçim hüququ verin: "Dərhal dərslərinə başla" kimi əmrlər verməyin. Bunun əvəzinə ondan dərslərini nə vaxt (cümə, şənbə, yoxsa bazar günü) etmək istədiyini soruşun. Siz sadəcə çərçivəni müəyyən edirsiniz, vaxtı isə uşaq özü seçir. Bu, onun məsuliyyət hissini artırır, çünki artıq yerinə yetirilən plan sizin deyil, onun öz seçimidir.

3. Nəticəni deyil, cəhdi tərifləyin: Uşağı aldığı yüksək qiymətə görə deyil, göstərdiyi səyə görə tərifləmək ən vacib məqamdır. Yalnız mükəmməl nəticəyə görə təriflənən uşaq səhv etməkdən qorxur və cəhd etməyi dayandırır. "Afərin ki, özün həll etdin" və ya "Çətin olsa da, yarımçıq qoymadın" kimi ifadələr bütün "beş"lərdən daha təsirlidir.

Y.Nadelyayevanın fikrincə, ev tapşırığı uşaqlarda planlaşdırma, özünüidarə və dözümlülük vərdişlərini formalaşdıran bir vasitədir. Valideynin dəstəyi daimi nəzarət deyil, seçim hüququna hörmət və göstərilən səylərin təqdir edilməsidir.

Xəbər maraqlı gəlib? Sosial şəbəkələrdə paylaşın