Hörmüz müəmması: Qalibaf Trampın dediklərini təkzib etdi

İran parlamentinin sədri Məhəmməd Baqir Qalibaf ABŞ Prezidenti Donald Trampın Tehranla danışıqlar aparılması barədə səsləndirdiyi iddialara cavab verib.

Gundem.today xəbər verir ki, qanunverici orqanın rəhbəri bu barədə özünün "Telegram" kanalında məlumat paylaşıb.

Qalibaf Trampın İranla ehtimal olunan danışıqlara dair bəyanatlarını yalan adlandıraraq, Hörmüz boğazının hələ də bağlı olduğunu vurğulayıb. Parlament sədrinin sözlərinə görə, Birləşmiş Ştatlar tərəfindən İran limanlarına tətbiq edilən blokada ləğv olunmayıb.

"Boğaz ərazisindən tranzit fəaliyyətləri müəyyən edilmiş marşrut üzrə və yalnız İranın icazəsi əsasında həyata keçiriləcək. Media müharibəsi və ictimai rəyin manipulyasiyası gedən müharibənin mühüm bir tərkib hissəsidir, lakin İran xalqı bu cür hiylələrin təsirinə məruz qalmayacaq", - deyə o qeyd edib.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.

Həmçinin Hörmüz boğazından gəmilərin keçidində ciddi problemlər yaranıb.

Aprelin 8-də Donald Tramp Tehrana verdiyi ultimatumun vaxtının bitməsinə bir neçə saat qalmış Vaşinqtonun ikihəftəlik atəşkəslə razılaşdığını elan edib.

Daha sonra İslamabadda tərəflərin ilk görüşü keçirilib.

Xəbər maraqlı gəlib? Sosial şəbəkələrdə paylaşın