KİV: İslamabadda piyada yolları bağlanıb

ABŞ və İran arasında baş tuta biləcək danışıqlar ərəfəsində Pakistan hakimiyyəti çoxtonnajlı maşınların İslamabada girişini qadağan edib. Hökumət binaları kompleksi və diplomatik anklavın yerləşdiyi "qırmızı zona" daxil olmaqla, şəhərin bir sıra əsas yolları bağlanıb.

Gundem.today xəbər verir ki, bu barədə "The Daily Pakistan" qəzeti məlumat yayıb.

Nəşrin məlumatına əsasən, paytaxt administrasiyası gücləndirilmiş təhlükəsizlik tədbirləri qüvvədə olduğu müddətdə bütün sakinləri və sərnişinləri yol hərəkətinin təşkili üzrə tövsiyələrə riayət etməyə və səfərlərini buna uyğun tənzimləməyə çağırıb. Bu tədbirlərə paytaxt daxilindəki populyar piyada turizm marşrutlarının növbəti xəbərdarlığadək bağlanması da daxildir. Belə məhdudlaşdırıcı addımlar əcnəbi nümayəndə heyətlərinin təhlükəsiz keçidini zəmanət altına almaq üçün yol hərəkətinin təşkili üzrə kompleks plan çərçivəsində həyata keçirilib. Xarici qonaqların kortejlərinin təhlükəsizliyini təmin etmək məqsədilə 100-ü snayper olmaqla, 400-dək elit xüsusi təyinatlı cəlb edilib. İslamabadda ictimai asayişin qorunmasına 7 000 paytaxt polisi ilə yanaşı, Pəncab əyalətindən olan 4 000 hüquq-mühafizə orqanı əməkdaşı nəzarət edir.

Xəbər maraqlı gəlib? Sosial şəbəkələrdə paylaşın