Londonda sinaqoqu yandırmağa cəhd edən iki nəfər saxlanılıb

Böyük Britaniya hüquq-mühafizə orqanları Londonun şimalındakı Finçli bölgəsində yerləşən sinaqoqu yandırmağa cəhd göstərməkdə şübhəli bilinən iki nəfəri həbs edib.

Gundem.today xəbər verir ki, bu barədə CNN məlumat yayıb.

Uotford şəhərində həyat üçün təhlükə yaradan qəsdən yandırma şübhəsi ilə 46 yaşlı kişi və 47 yaşlı qadın saxlanılıblar. Polisin məlumatına görə, hadisə səhər saatlarında qeydə alınıb: tünd rəngli geyimdə və maskada olan iki şəxs ibadətgahın ərazisinə daxil olaraq binaya kərpic atıb, pəncərələrin kənarına içərisində tezalışan maye olduğu ehtimal edilən şüşələr düzüblər. Şüşələrdən biri sınsa da, yanğın baş verməyib.

Hadisə nəticəsində xəsarət alan olmayıb və dağıntı qeydə alınmayıb. Hüquq-mühafizə orqanları baş verənləri antisemit nifrət zəminində törədilmiş cinayət kimi qiymətləndirir və ərazidə təhlükəsizlik tədbirlərini gücləndirib. Sinaqoqun rəsmiləri fiziki zərərin olmamasına baxmayaraq, bu hücumun ciddi emosional sarsıntı yaratdığını bildiriblər. Bu insident Qolders-Qrin ərazisində baş vermiş digər hadisədən bir neçə həftə sonra qeydə alınıb, lakin polis bu iki hadisə arasında hər hansı bağlantı aşkar etməyib.

Xəbər maraqlı gəlib? Sosial şəbəkələrdə paylaşın