Təmkin Xəlilzadə ulduzlarla eyni komandada çıxış edəcək

Futbol üzrə Azərbaycan milli komandasının sabiq oyunçusu Təmkin Xəlilzadə karyerasını Türkiyədə davam etdirməyə hazırlaşır.

Gundem.today-ın məlumatına görə, 32 yaşlı təcrübəli cinah müdafiəçisi Türkiyəni təmsil edən "Volves" minifutbol klubu ilə rəsmi anlaşma əldə edib.

Yeni transferlə bağlı müqavilənin müddəti və digər detalları barədə ictimaiyyətə hələ ki, heç bir rəsmi açıqlama təqdim olunmayıb.

Təcrübəli futbolçu ənənəvi olaraq hər il təşkil edilən "Golazo" turnirində iştirak etmək məqsədilə heyətə daxil edilib. Diqqətçəkən məqam ondan ibarətdir ki, "Volves"in heyətində Martin Şkrtel və Fernandao kimi tanınmış adlar da yer alacaq. Bundan əlavə, sözügedən turnirdə Rayan Babel, Rikardo Kuarejma, Yohan Elmander və Tuncay Şanlı kimi dünya futbolunun məşhur simaları da öz məharətlərini göstərəcəklər.

Karyerası ərzində ölkəmizin "Qarabağ", "Zirə", "Qəbələ", AZAL və "Sabah" kimi aparıcı klublarında çıxış etmiş Təmkin Xəlilzadə Azərbaycan yığmasının heyətində 17 matçda iştirak edərək rəqib qapılarından üç top keçirib. Son dövrlərdə əsas diqqətini minifutbola yönəldən idmançı 2025-ci ildə bu növ üzrə ilin ən yaxşı oyunçusu adına layiq görülüb.

Xəbər maraqlı gəlib? Sosial şəbəkələrdə paylaşın