Tramp administrasiyasından Livan-İsrail masasına yeni təklif: Detallar məlum oldu

Livan və İsrail nümayəndə heyətləri atəşkəs rejiminin uzadılması şərtlərini müzakirə etmək üçün mayın 13-15-də Vaşinqtonda görüşəcəklər.

Gundem.today xəbər verir ki, bu barədə LBCI telekanalı ABŞ Dövlət Departamentindəki mənbələrə istinadən məlumat yayıb.

Məlumata görə, Livan nümayəndə heyətinə ABŞ-dəki sabiq səfir Simon Karam rəhbərlik edəcək.

Qeyd edək ki, tərəflər arasında görüşlər ABŞ Prezidenti Donald Tramp Administrasiyasının dəstəyi ilə Dövlət Departamentində keçirilir. Aprelin 14-də baş tutan ilk raunddan sonra aprelin 17-dən etibarən Livanda atəşkəs razılaşdırılıb, aprelin 23-də keçirilən ikinci raundun nəticəsində isə bu rejim üç həftə uzadılıb.

Bildirilir ki, Livan atəşkəsin yenidən uzadılmasını və cənub bölgələrdən qoşunların çıxarılması cədvəlinin hazırlanmasını istəyir. İsrail isə "Hizbullah"ın tam silahsızlaşdırılmasını və uzunmüddətli sülh sazişinin imzalanmasını tələb edir.

Xəbər maraqlı gəlib? Sosial şəbəkələrdə paylaşın