Yasamalda EV QALMAQALI: "Məhkəmə qərarına baxmayaraq, kommunal xidmətlər dayandırılıb" - VİDEO

Bakının Yasamal rayonunda evinin sökülməsindən narazı qalan vətəndaş şikayətini ictimailəşdirib.

Gundem.today xəbər verir ki, bununla bağlı sosial şəbəkələrdə videogörüntülər yayılıb.

Bildirilib ki, vətəndaşın evinin sökülməsi ilə bağlı məsələ hazırda məhkəmə icraatındadır. Buna baxmayaraq, aprelin 14-də yaşayış sahəsinə verilən kommunal xidmətlərin dayandırıldığı iddia olunur.

Şikayətçi qeyd edib ki, məhkəmə qərarına əsasən, ev toxunulmaz hesab edilir.

"Hazırda məhkəmənin qərarı var ki, ev toxunulmazdır. Qətnaməyə baxmayaraq, bu gün gəlib qazımızı, suyumuzu və işığımızı kəsiblər", - deyə vətəndaş bildirib.

Gundem.today-ın sorğusuna cavab olaraq Fövqəladə Hallar Nazirliyinin (FHN) Mətbuat Xidmətindən bildirildi ki, Yasamal rayonu, A.Şaiq küçəsi, S.Tağızadə küçəsi və N.Nərimanov prospektinin kəsişdiyi ərazidə "Alians Development" MMC tərəfindən çoxmərtəbəli yaşayış binasının inşası həyata keçirilir.

"Yaşayış binasının layihə sənədləri aidiyyəti qurumlarla razılaşdırılıb, müvafiq qaydada ekspertizadan keçirilib. Həmçinin ekspertiza rəyi əsasında layihəyə müvafiq qurum tərəfindən tikintiyə icazə sənədi verilib.

FHN-in Tikintidə Təhlükəsizliyə Nəzarət Dövlət Agentliyinin mütəxəssisləri tərəfindən əraziyə vizual baxış keçirilib və sözügedən fərdi yaşayış evinin qəzalı vəziyyətə olduğu müəyyən edilib.

Bununla bağlı aidiyyəti qurumlar məlumatlandırılıb", - deyə açıqlamada bildirilib.

Yasamal Rayonu İcra Hakimiyyətindən (RİH) Gundem.today-ın sorğusuna cavab olaraq bildirilib ki, sözügedən ünvana aidiyyəti qurumlar tərəfindən baxışlar keçirilib, fərdi yaşayış evinin istismar müddətinin bitdiyi və hazırda qəzalı durumda olduğu barədə rəy verilib.

"Son leysan yağışlarından sonra ərazidə torpaq yuyulub və bu evdə yaşayışın davam etməsi yerli sakinlər üçün təhlükə yaradır. RİH tərəfindən vətəndaşa təxliyə çağırışı edilib, iki dəfə kirayə haqqı ödənişi təklif olunsa da, vətəndaş bundan imtina edib. Bu hal, habelə ətraf ərazilərdə istismar müddəti bitmiş digər evlərin söküntüsü kommunal xidmətlərin məhdudlaşdırılması və beləliklə təhlükənin öncədən qarşısının alınması zərurətini yaradıb", - deyə məlumatda vurğulanıb.

Xəbər maraqlı gəlib? Sosial şəbəkələrdə paylaşın