ABŞ-də sürücülər müşahidə kameralarına görə şəhər hakimiyyətini məhkəməyə veriblər

ABŞ-nin Kaliforniya ştatının San-Xose şəhərindən olan üç sürücü şəhər rəhbərliyinə və yerli polisə qarşı kollektiv iddia qaldıraraq, hüquq-mühafizə orqanlarını 500 kameradan ibarət "Flock Safety" şəbəkəsindən istifadə üçün məhkəmə orderi almağa məcbur etməyi tələb ediblər.

Gundem.today "NBC News" telekanalına istinadən xəbər verir.

Süni intellektə əsaslanan texnologiya avtomobillərin nömrələrini və hərəkətlərini qeydə alır. İddiaçılar isə bildirirlər ki, bu məlumatlar order olmadan ümumi məlumat bazalarında saxlanılır.

İddiada deyilir ki, bu cür nəzarət ABŞ Konstitusiyasının dördüncü düzəlişini pozur. Həmin düzəliş hakimiyyət orqanlarına əsassız axtarış və müsadirələr aparmağı qadağan edir. Son 30 gün ərzində kameralar 2,8 milyon keçidi qeydə alıb, polis isə məlumat bazasına 4 099 dəfə müraciət edib. Eyni zamanda, Kaliforniya üzrə məlumatlara minlərlə dövlət əməkdaşı çıxış əldə edə bilir.

San-Xose hakimiyyəti artıq məlumatların saxlanma müddətini bir ildən bir aya endirib. "Flock Safety" şirkətinin nümayəndələri bildirirlər ki, məhkəmələr bu texnologiyanı konstitusiyaya uyğun hesab ediblər. Lakin iddiaçılar israr edirlər ki, kameralar həssas məkanlarda - hospislər, xəstəxanalar və immiqrasiya hüquqşünaslarının ofisləri yaxınlığında quraşdırılıb. Sürücülər, həmçinin order olmadıqda bütün görüntülərin 24 saat ərzində silinməsini tələb edirlər.

Xəbər maraqlı gəlib? Sosial şəbəkələrdə paylaşın