"Apple"dan fotoşəkillərin redaktəsi ilə bağlı YENİLİK

"Apple" şirkəti "Android" əməliyyat sistemli cihazlarla rəqabəti gücləndirmək məqsədilə "iPhone", "iPad" və "Mac" kompüterləri üçün süni intellekt (Sİ) texnologiyasına əsaslanan yeni foto redaktə imkanlarını istifadəyə verməyə hazırlaşır.

Gundem.today xəbər verir ki, bu barədə "Bloomberg" məlumat yayımlayıb.

Bildirilir ki, daxili süni intellekt modellərinin köməyi ilə təsvirlərin emalı prosesi cəmi bir neçə saniyə çəkəcək. Yeni vasitələrin bu payız mövsümündə "iOS 27" üçün nəzərdə tutulmuş "Apple Intelligence" platforması çərçivəsində istifadəçilərə təqdim olunması gözlənilir.

Hazırda "Apple" cihazlarında şəkilləri kəsmək və filtrlər əlavə etmək mümkündür. Bununla yanaşı, təsvirlərdən arzuolunmaz obyektləri silmək üçün süni intellektlə çalışan "Təmizlə" adlı yeganə redaktə rejimi də mövcuddur. Növbəti "iOS" yenilənməsində isə "Apple Intelligence" vasitələrindən ibarət xüsusi bölmə yaradılacaq ki, bura "Genişləndirmək", "Təkmilləşdirmək" və "Yenidən çərçivələmək" kimi funksiyalar daxil ediləcək.

Lakin bu yeni xüsusiyyətlərin ərsəyə gəlməsi müəyyən çətinliklərlə müşayiət olunur. Tərtibatçılar bildirirlər ki, bəzi alətlər sınaq mərhələsində zəif göstəricilər nümayiş etdirib. Bundan başqa, istifadəçilər "Apple"in ilkin süni intellekt alətinin fəaliyyətini tənqid edərək, bəzən arzuolunmaz nəticələr ortaya çıxardığını vurğulayıblar.

Agentliyin hesabatında qeyd olunur ki, şirkət süni intellekt texnologiyasını şəkil redaktorlarına tam inteqrasiya etmək üzərində çalışır. Xatırladaq ki, əsas rəqiblərdən biri olan "Google" artıq uzun müddətdir "Pixel" smartfonlarında "Sehrli Silgi" (obyektləri silmək), "Kəskinləşdir" (bulanıqlığı aradan qaldırmaq) və digər bənzər funksiyaları təqdim edir. Eyni zamanda, "Samsung Electronics" də özünün "Galaxy" cihazlarında süni intellekt əsaslı foto redaktəsini aktiv şəkildə tətbiq etməkdədir.

Xəbər maraqlı gəlib? Sosial şəbəkələrdə paylaşın