"Arsenal"ın sabiq futbolçusu karyerasını başa vurdu - FOTO

Uels yığmasının və İngiltərənin "Arsenal" klubunun sabiq futbolçusu Aaron Remzi peşəkar futbolçu karyerasını sona çatdırıb.

Gundem.today-ın xəbərinə görə, 35 yaşlı tanınmış idmançı yaşıl meydanlarla vidalaşması barədə rəsmi sosial şəbəkə hesabında izləyicilərinə məlumat verib.

"Bu qərarı vermək heç də asan olmadı. Uzun düşüncələrdən sonra futboldan ayrılmaq qərarına gəldim. Sözlərimə ilk olaraq Uels millisindən başlamaq istəyirəm. O formanı daşımaq və komanda ilə bu cür anları bölüşmək mənim üçün böyük şərəf idi. Karyeramın inkişafında əməyi keçən bütün məşqçilərə və texniki heyətə öz dərin minnətdarlığımı bildirirəm", - deyə ulduz futbolçu paylaşımında qeyd edib.

Təcrübəli oyunçu, eyni zamanda, indiyə qədər formasını geyindiyi bütün klublara da öz təşəkkürünü çatdırıb.

Xatırladaq ki, uelsli yarımmüdafiəçi zəngin karyerası boyunca İngiltərənin "Arsenal", "Kardiff Siti", "Nottingem Forest", Fransanın "Nitsa", Şotlandiyanın "Qlazqo Reyncers" və İtaliyanın "Yuventus" kimi tanınmış klublarında çıxış edib. Peşəkar futbolçunun son dayanacağı isə Meksikanın "Pumas" komandası olub.

Karyerası ərzində böyük uğurlara imza atan Remzi klub səviyyəsində üç dəfə İngiltərə Kuboku və Superkubokunun, eləcə də İtaliya və Şotlandiya kuboklarının qalibi adını qazanıb. Uels yığmasının heyətində isə o, ümumilikdə 86 rəsmi matçda meydana çıxaraq rəqib qapılarından 21 top keçirib.

Xəbər maraqlı gəlib? Sosial şəbəkələrdə paylaşın