Azərbaycan Avroparlamentlə əlaqəni niyə kəsdi? - "Rasional və prinsipial qərardır" - FOTO

"Avropa siyasətində "demokratiyanın səsi" kimi təqdim olunan Avropa Parlamenti son illər Azərbaycana münasibətdə getdikcə daha çox sual doğuran, qərəzli və selektiv yanaşmaları ilə diqqət çəkir".

Bunu Gundem.today-a deputat Vüqar İskəndərov Avropa Parlamentinin Azərbaycana qarşı qətnaməsini şərh edərkən deyib.

Onun sözlərinə görə, rəsmi Bakının dəfələrlə bu qurumu obyektiv mövqeyə çağırmasına baxmayaraq, qəbul edilən qətnamələr və verilən bəyanatlar göstərir ki, burada prinsipiallıqdan çox siyasi sifarişlər və lobbi maraqları üstünlük təşkil edir:

"Azərbaycanın bu qurumla münasibətləri rəsmi şəkildə dayandırmaq qərarı təsadüfi addım deyil. Milli Məclis tərəfindən qəbul edilən bu qərar əslində uzun müddətdir yığılıb qalan narazılıqların məntiqi nəticəsidir. Avropa Parlamenti ilə bütün istiqamətlər üzrə əməkdaşlığın dayandırılması, o cümlədən Avronest Parlament Assambleyası çərçivəsində fəaliyyətə xitam verilməsi artıq formal münasibətlərin belə mənasını itirdiyini göstərir. Məsələ təkcə siyasi bəyanatlarla məhdudlaşmır. 30 aprel tarixində qəbul edilən qətnamə fonunda Avropa İttifaqı səfirinin Xarici İşlər Nazirliyinə çağırılması və etiraz notasının təqdim edilməsi də vəziyyətin nə qədər ciddi olduğunu göstərir. Bu adekvat addımlar Azərbaycanın suverenliyinə və daxili işlərinə müdaxilə cəhdlərinə qarşı açıq mesajdır. Reallıq ondan ibarətdir ki, xüsusilə Azərbaycanın Vətən müharibəsindən sonra Avropa Parlamenti ölkəmizə qarşı ardıcıl şəkildə qərəzli mövqe sərgiləyib. Müharibədən sonrakı dövrdə qəbul edilən 10-dan artıq qətnamə - istər "mədəni irs", istər "insan hüquqları", istərsə də regional proseslərlə bağlı - balanslı yanaşmadan uzaq olub və əksər hallarda birtərəfli qərəzli məlumatlara əsaslanıb. Bu isə həmin sənədlərin siyasi motivli olduğunu açıq şəkildə ortaya qoyur".

V.İskəndərovun sözlərinə görə, Prezident İlham Əliyev hələ 2026-cı ilin yanvarında "Euronews" telekanalına müsahibəsində bu məsələyə toxunaraq bildirmişdi ki, Avropa Parlamentində formalaşan anti-Azərbaycan mövqeyi müəyyən lobbi qruplarının təsirinin nəticəsidir:

"Bu fikri təsdiqləyən kifayət qədər fakt var. Son illərdə Avropa Parlamentinin özü də müxtəlif qalmaqallarla gündəmə gəlib. Xüsusilə Qatargeyt kimi korrupsiya iddiaları, eləcə də müxtəlif şirkət və dövlətlərin təsir imkanları barədə yayılan məlumatlar bu qurumun şəffaflığı ilə bağlı ciddi şübhələr yaradıb. Bu fonda onun digər ölkələrə "dərs keçməsi" ən azı paradoksal görünür. Digər tərəfdən, Avropa Parlamentinin real təsir imkanları da tez-tez müzakirə olunur. Qanunvericilik təşəbbüsü hüququnun məhdud olması, qəbul edilən qətnamələrin hüquqi deyil, daha çox siyasi xarakter daşıması bu təsisatın faktiki rolunu sual altına alır. Bununla yanaşı böyük maliyyə xərcləri, deputatların gəlirlərinə nəzarət mexanizmlərinin zəifliyi də tənqid obyektidir. Bütün bunların fonunda Azərbaycanla bağlı qəbul edilən qətnamələrin obyektivlikdən uzaq olması təəccüb doğurmur. Bu sənədlər nə regionda sülhə töhfə verir, nə də real problemlərin həllinə xidmət edir. Əksinə, onlar gərginliyi artırır və dialoq imkanlarını məhdudlaşdırır. Nəticə etibarilə Azərbaycanın Avropa Parlamenti ilə münasibətləri dayandırması emosional deyil, rasional və prinsipial qərardır. Bu addım ölkənin suveren siyasətinə hörmət tələbini və beynəlxalq münasibətlərdə ikili standartların qəbul olunmadığını bir daha nümayiş etdirir".

Xəbər maraqlı gəlib? Sosial şəbəkələrdə paylaşın