Azərbaycan XİN-dən Nyu-York merinin "erməni soyqırımı" iddialarına SƏRT CAVAB - FOTO

"Nyu-York şəhərinin meri Zohran Mamdani, ictimai şəxslər məsuliyyətli davranmalı, yanlış məlumat yaymaqdan çəkinməli və siyasi motivli, tarixi baxımdan əsassız bəyanatlarla parçalanmanı dərinləşdirmək əvəzinə barışığa töhfə verməlidirlər".

Gundem.today xəbər verir ki, bunu Xarici işlər Nazirliyinin mətbuat katibi Ayxan Hacızadə Amerika Birləşmiş Ştatlarının Nyu-York şəhərinin meri Zohran Mamdaninin "erməni soyqırımı" ilə bağlı paylaşımına cavabında bildirib.

O, paylaşımında qeyd edib:

"Biz sizin təxribat xarakterli bəyanatınızı rədd edirik. Bu cür fikirlər regionun tarixi və reallıqları barədə anlayışın yetərsiz olduğunu göstərir və faktları siyasi məqsədlər naminə təhrif edir.

2020-ci ildə Azərbaycan beynəlxalq hüquqa və BMT Təhlükəsizlik Şurasının qətnamələrinə uyğun olaraq beynəlxalq səviyyədə tanınmış suveren ərazisi daxilində hərəkət edib.

2023-cü ildə həyata keçirilən antiterror tədbirləri üçonillik davam edən qanunsuz işğaldan sonra Azərbaycanın konstitusiya quruluşunun bərpası ilə nəticələnib. "Qovulma" iddiaları isə erməni sakinlərə reinteqrasiya, tam bərabər hüquqlar və təhlükəsizlik təminatlarının təklif edildiyini nəzərə almır.

Seçilmiş bir vəzifəli şəxsin birtərəfli yanaşmanı təşviq etməsi, işğal dövründə yüzminlərlə azərbaycanlıya qarşı törədilmiş etnik təmizləmə və qırğınları, həmçinin mədəni və dini irsin məhv edilməsini görməzdən gəlməsi xüsusilə narahatedicidir.

Belə məsuliyyətsiz açıqlamalar qəbuledilməzdir və dərhal silinməlidir".

Xəbər maraqlı gəlib? Sosial şəbəkələrdə paylaşın