Bəzi hallarda sərnişinlərdən metroda əlavə ödəniş tələb edilə bilər - Qanun nə deyir? - VİDEO

Metrodan istifadə edən bir çox sərnişin hesab edir ki, əl yükünə görə əlavə ödəniş tələb olunmur. Amma ölçü və həcm həddini aşan yüklər üçün müəyyən ödəniş qaydaları mövcuddur.

Gundem.today-ın "Qanun nə deyir?" adlı rubrikasının bugünkü mövzusu metrodan istifadə qaydalarıdır.

Ölçü də, say da şərtdir

Nazirlər Kabinetinin 2010-cu il 19 oktyabr tarixli 179 nömrəli qərarı ilə təsdiq edilmiş Bakı Metropolitenindən istifadə qaydalarında qeyd olunur ki, sərnişinlər uzunluq, en və hündürlük, ölçülərinin cəmi 121 sm-dən 200 sm-ə qədər olan hər bir əl yükü üçün, eləcə də uzunluğu 151 sm-dən 220 sm-ə qədər olan uzun ölçülü hər bir əl yükü üçün gediş haqqı ödəməlidirlər.

Əl yükü elə bükülməli, bağlanmalı və bərkidilməlidir ki, sərnişinlərə xəsarət yetirməsin. Daşınmasına icazə verilən əl yükünün sayı ikidən çox olmamalıdır. Ödənişsiz keçid hüququnu verən sənəd gediş haqqı ödənilməli olan əl yükünün ödənişsiz aparılmasına hüquq vermir.

Bundan başqa, müəyyən edilmiş halda metroda bəzi şəxslərə yer vermək məcburidir.

Belə ki, əlilliyi olan şəxslərə, qocalara, hamilə qadınlara və uşaqlı sərnişinlərə oturmağa yer verməlidir.

Həmçinin metropoliten rəhbərliyinin icazəsi olmadan metropolitenin elektrik şəbəkəsinə elektrik işlədiciləri qoşmaq qadağandır.

Bu qaydanı pozanlarına görə də cərimə müəyyənləşib.

İnzibati Xətalar Məcəlləsinin 306-cı maddəsində qeyd olunur ki, müvafiq icazə olmadan elektrik işlədicilərindən istifadəyə görə 70 manat məbləğində cərimə nəzərdə tutulur.

Xəbər maraqlı gəlib? Sosial şəbəkələrdə paylaşın