Böyük Britaniyada vəfat etmiş şəxslərə bir milyard dollardan çox səhv müavinət ödənilib

Böyük Britaniyanın Əmək və Pensiya Nazirliyi 2021-ci ildən bəri dünyasını dəyişmiş vətəndaşlara səhvən 1 milyard dollardan çox məbləğdə müavinət ödəyib.

Gundem.today xəbər verir ki, bu barədə "The Telegraph" nəşri məlumat yayıb.

Məqalədə qeyd olunur ki, Əmək və Pensiya Nazirliyi alıcılara ölümlərindən sonra ümumilikdə 850 milyon funt-sterlinq (təxminən 1.1 milyard dollar) dəyərində vəsait ayırıb. 2021-ci ildən bəri yol verilən 2.6 milyon səhvin konkret olaraq hansı müavinət növlərinə aid olduğu tam bilinməsə də, bu ödənişlərin işsizlik, pensiya və psixi sağlamlıq problemləri olan şəxsləri əhatə etdiyi ehtimal olunur.

Hökumət qanunsuz ayrılan məbləğin yarısından azını geri qaytara bilib. Ümumilikdə isə sosial müavinətlər britaniyalı vergiödəyicilərinə ildə təxminən 300 milyard funt-sterlinqə (təqribən 400 milyard dollar) başa gəlir.

Səhv ödənişlərin əsas səbəbi kimi ölüm barədə bildirişlərin nazirliyə gec daxil olması və ya ödəniş anında sistemdə əks olunmaması göstərilir.

Məlumata görə, 2025-ci il ərzində hökumət vətəndaşlara ümumilikdə 9.5 milyard funt-sterlinq məbləğində əlavə (artıq) müavinət ödəyib. Bu məbləğin üçdə ikisindən çoxu dələduzluq halları, 20%-i isə müraciət edənlərin səhvləri ilə bağlıdır.

Bundan əlavə, 2023-cü ilin aprel ayından etibarən qış yanacağı üçün nəzərdə tutulan təxminən 27 milyon funt-sterlinq vəsait 83 minə yaxın vəfat etmiş şəxsə göndərilib. Bu rəqəmlər ümumi artıq ödəniş statistikasına daxil edilməyib.

Xəbər maraqlı gəlib? Sosial şəbəkələrdə paylaşın