BTQ tərəfindən təşkil edilmiş beynəlxalq konfrans dünya mediasında

Bakı Təşəbbüs Qrupunun (BTQ) təşkilatçılığı ilə neokolonializm və qlobal bərabərsizliyə həsr edilmiş beynəlxalq konfrans beynəlxalq media və akademik dairələrin diqqət mərkəzində qalmaqda davam edir.

Gundem.today xəbər verir ki, Kamerunda fəaliyyət göstərən, ABŞ, Böyük Britaniya, Çin kimi ümumilikdə 10-dan çox ölkədə fəaliyyət göstərən Kesmonds Beynəlxalq Universitetinin rəsmi internet səhifəsində BTQ-nin fəaliyyətinə və adıçəkilən tədbirə həsr olunmuş "Müstəmləkə bərabərsizliyi diqqət mərkəzində: Bakı Təşəbbüs Qrupunun təşkil etdiyi konfransdan düşüncələr" ("Colonial Inequality in Focus: Reflections from the Baku Initiative Group Conference") analitik material dərc edilib.

Məqalədə konfransda ilk dəfə olaraq müstəmləkə ərazilərinin yerli əhalisi ilə birbaşa yerində işləyən antropoloqlar və psixoterapevtlər, müstəmləkəçiliyə həsr edilmiş Virtual Muzeyin yaradılmasında iştirak etmiş ekspertlər, eləcə də həmin ərazilərdə fəaliyyət göstərən müstəqillik hərəkatlarının rəhbər şəxsləri, həmçinin neokolonializm sahəsində ixtisaslaşmış tədqiqatçılarla bərabər Kesmonds Beynəlxalq Universitetindən nümayəndələrin iştirakının BTQ-nin fəaliyyətinin coğrafi baxımdan əhatə dairəsinin genişliyini nümayiş etdirdiyi qeyd edilir. Xüsusilə ekspertlərin vahid platformada bir araya gələrək kolonializm və neokolonializmin ağır nəticələri, tarixi ədalət və məsuliyyət məsələlərinin beynəlxalq gündəmdə saxlanılması ətrafında müzakirələrin aparılmasının Bakı Təşəbbüs Qrupunun qlobal səviyyədə strateji diskussiya aparan nüfuzlu beynəlxalq təşkilat olmasının və platformaya çevrildiyinin bariz nümunəsi olduğu vurğulanır.

Kolonializm və neokolonializmin səbəb olduğu qlobal bərabərsizlik, həmin ərazilərdə müstəmləkə gücləri tərəfindən həyata keçirilən iqtisadi istismar, yerli əhalinin torpaqlarından qanunsuz məhrum edilməsi və öz ölkələrinin real iqtisadiyyatında iştirak imkanlarından kənarda saxlanılması, müstəmləkə istismarı nəticəsində sərvətlərin bir əldə cəmləşməsi, məcburi əmək, köləlik, irqi ayrı-seçkilik və təhsilə çıxış imkanlarının məhdud olması, Haitinin nümunəsində müstəqillik əldə etdikdən sonra onların üzərinə qoyulan təzminat öhdəliyi, ölkənin inkişafını nəsillər boyu məhdudlaşdıran böyük borc yükü kimi məsələlərin tədbirdə daha dərindən işıqlandırıldığı diqqətə çatdırılır.

Analitik materialda Bakı Təşəbbüs Qrupunun yalnız kolonializm və neokolonializmdən qaynaqlanan tarixi ədalət məsələlərini gündəmə gətirən qurum deyil, eyni zamanda müasir dünya üçün davamlı və konstruktiv həll yolları irəli sürən qlobal düşüncə platforması olduğu oxucuların diqqətinə çatdırılır.

Xəbər maraqlı gəlib? Sosial şəbəkələrdə paylaşın