Fransada qanunsuz gecə şənliyində mərmi tapıldı

Fransanın Şer departamenti ərazisində mayın 1-dən etibarən davam edən qeyri-qanuni gecə şənliyinin keçirildiyi hərbi poliqon yaxınlığında mərmi aşkar edilib.

Gundem.today "Ici" radiostansiyasına istinadən xəbər verir ki, sursat poliqon ərazisinə bitişik olan D102 şosesi yaxınlığında tapılıb.

Hadisə yerinə gələn istehkamçılar mərmini xüsusi təhlükəsizlik zonasına daşıyıblar. "Le Parisien" qəzetinin məlumatına görə, Fransanın daxili işlər naziri Loran Nunyes bazar günü poliqona gələrək yerli rəsmilər və hüquq-mühafizə orqanları ilə görüşüb. O, həmçinin hələ də 17 000 nəfərin qaldığı əraziyə helikopterlə baxış keçirib.

Yerli sakinlər səs-küy və zibillə bağlı narazılıqlarını bildirərək, ordunun poliqonlara nəzarəti lazımi səviyyədə təmin edə bilməməsinə etiraz edirlər.

"Fransanın daxili işlər naziri Loran Nunyes Burj kommunası yaxınlığındakı hərbi poliqona səfərinin yekununda 33 nəfərin xəsarət aldığını, onlardan 5-nin vəziyyətinin ağır olduğunu bildirib.

Nunyes bildirib ki, 28 nəfər yüngül xəsarət alıb, daha 5 nəfər ağır vəziyyətdədir, 12 nəfər o cümlədən narkotik vasitələrin istifadəsi ilə bağlı hallara görə xəstəxanalara çatdırılıb.

Nunyes tədbirin hərbi ərazidə keçirilməsini pisləyib və qeyd edib ki, bu qanunsuz yığıncağı tərk edən hər kəs həm qapalı zonaya daxil olduğu üçün, həm də qadağan olunmuş tədbirdə iştirak etdiyinə görə cərimələnəcək. Onun sözlərinə görə, artıq 600-ə yaxın cərimə kəsilib, 7 nəfər isə polisə hücum və tabesizlik göstərdiyi üçün saxlanılıb.

Xatırladaq ki, təşkilatçıların 30 000 nəfər gözlədiyi qeyri-qanuni festival yerli hakimiyyət tərəfindən təhlükəli hesab edildiyi üçün razılaşdırılmayıb.

Xəbər maraqlı gəlib? Sosial şəbəkələrdə paylaşın