İran Hörmüz boğazından keçən gəmilər üçün alternativ marşrutlar müəyyənləşdirdi

İran Hərbi Dəniz Qüvvələri Hörmüz boğazından keçməyi planlaşdıran gəmilərin minalarla toqquşma ehtimalını aradan qaldırmaq məqsədilə rəsmi Tehranın təklif etdiyi iki alternativ marşrutdan istifadə olunacağını açıqlayıb.

Gundem.today xəbər verir ki, bu barədə İslam İnqilabı Keşikçiləri Korpusu (SEPAH) məlumat yayıb.

"Fars körfəzi, Hörmüz boğazında hərbi vəziyyət və dənizdə müxtəlif gəmi əleyhinə minaların mövcudluğu ehtimalı ilə əlaqədar boğazdan keçmək niyyətində olan bütün gəmilər sonrakı xəbərdarlığa qədər SEPAH ilə koordinasiyalı şəkildə alternativ hərəkət marşrutlarından istifadə etməlidirlər. Bu qərar dəniz təhlükəsizliyi prinsiplərinə riayət etmək və dəniz minaları ilə potensial toqquşmalardan qorunmaq üçün verilib", - deyə SEPAH-dan bildirilib.

Məlumata görə, SEPAH-ın təklif etdiyi hər iki alternativ marşrut Larak adasının akvatoriyasına aiddir.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.

Həmçinin Hörmüz boğazından gəmilərin keçidində ciddi problemlər yaranıb.

Aprelin 8-də Donald Tramp Tehrana verdiyi ultimatumun vaxtının bitməsinə bir neçə saat qalmış Vaşinqtonun ikihəftəlik atəşkəslə razılaşdığını elan edib.

Xəbər maraqlı gəlib? Sosial şəbəkələrdə paylaşın