İrandan SƏRT BƏYANAT: "Ölkənin müdafiə sektoru müzakirə obyekti ola bilməz"

"İran İslam Respublikası Amerika Birləşmiş Ştatları ilə aparılan təmaslar çərçivəsində öz raket proqramına dair məsələlərə toxunmayıb və bundan sonra da bu mövzunu müzakirə etməyəcək".

Gundem.today xəbər verir ki, bunu İranın Xarici İşlər Nazirliyinin sözçüsü İsmayıl Bəqai deyib. Mətbuat konfransı zamanı jurnalistlərin İslamabadda ABŞ nümayəndələri ilə görüşlərdə raket proqramının gündəmə gətirilib-gətirilməməsi ilə bağlı sualını cavablandıran diplomat bildirib:

"Sizin bu sualınız çox qəribədir. Biz indiyə qədər dəfələrlə bəyan etmişik ki, dövlətimizin müdafiə sahəsi müzakirə oluna bilməz və heç bir halda danışıqların predmeti deyil".

Bundan başqa "Reuters" agentliyinin yüksəkrütbəli İran rəsmisinə istinadən verdiyi məlumata görə də, rəsmi Tehranın müdafiə potensialı, eləcə də raket proqramı ABŞ ilə ehtimal olunan danışıqların mövzusu ola bilməz. Həmçinin qeyd edilib ki, İranın nüvə proqramı ətrafında tərəflər arasındakı ziddiyyətlər hələ də qalmaqdadır və ABŞ-nin İrana qarşı hərbi-dəniz blokadasını davam etdirməsi sülh danışıqlarına zərbə vurur.

Rəsmi Tehran Birləşmiş Ştatlarla nəticəsiz dialoqlara zaman sərf etmək istəmir və Vaşinqtondan öz mövqeyinə aydınlıq gətirməsini tələb edir.

Gundem.today məlumat verir ki, bu fikirləri İran Parlamentinin (Məclisin) Milli təhlükəsizlik komitəsinin sədri İbrahim Əzizi "Əl-Cəzirə" telekanalına müsahibəsində səsləndirib.

"Danışıqlar prosesinə qatılmaqla əlaqədar hər hansı bir problemimiz yoxdur. Ancaq biz vaxt itkisinə səbəb olacaq görüşlərlə razılaşmırıq. Aparılan müzakirələr İran üçün dəqiq və müəyyən yekunlara malik olmalıdır. Lakin ABŞ-nin bu prosesdəki mövqeyi hələ də tam olaraq formalaşmayıb", - deyə o vurğulayıb.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.

Həmçinin Hörmüz boğazından gəmilərin keçidində ciddi problemlər yaranıb.

Aprelin 8-də Donald Tramp Tehrana verdiyi ultimatumun vaxtının bitməsinə bir neçə saat qalmış Vaşinqtonun ikihəftəlik atəşkəslə razılaşdığını elan edib.

Daha sonra İslamabadda tərəflərin ilk görüşü keçirilib.

Xəbər maraqlı gəlib? Sosial şəbəkələrdə paylaşın