Maduronun həbsindən sonra ABŞ-dən ilk mühüm iqtisadi qərar: Venesuela üçün yeni dövr başlayır

ABŞ Administrasiyası Venesuela banklarına və hökumətinə qarşı tətbiq olunan birtərəfli sanksiyaları yumşaldıb.

Gundem.today TASS-a istinadən xəbər verir ki, bu barədə ABŞ Maliyyə Nazirliyinin Xarici Aktivlərə Nəzarət İdarəsinin açıqladığı iki ümumi lisenziyada bildirilir.

Qeyd olunur ki, Vaşinqton müəyyən şərtlərlə Venesuela hökuməti ilə kommersiya müqavilələrinin bağlanmasına icazə verib. Bununla belə, Rusiya, İran, Şimali Koreya və Kubada olan şəxslərlə əməliyyatlara qadağa qüvvədə qalır. Bundan əlavə, Çin və ya onun yurisdiksiyasında fəaliyyət göstərən təşkilatlarla da əməliyyatlara icazə verilmir. ABŞ Maliyyə Nazirliyinin icazə verdiyi Venesuela banklarının siyahısına dörd bank daxil edilib.

ABŞ ilin əvvəlində bu Cənubi Amerika ölkəsində həyata keçirilən hərbi əməliyyatdan sonra Venesuelaya qarşı sanksiya rejimini mərhələli şəkildə yumşaldır.

Xatırladaq ki, yanvarın 3-də ABŞ Venesuelada mülki və hərbi obyektlərə zərbələr endirib, ölkə prezidenti Nikolas Maduronu həyat yoldaşı Siliya Floreslə birlikdə ələ keçirərək ABŞ-yə aparıb. Yanvarın 5-də onlar Nyu-York ştatının Cənub dairə məhkəməsi qarşısına çıxarılıblar.

Xəbər maraqlı gəlib? Sosial şəbəkələrdə paylaşın