Mbappe Çempionlar Liqasında Messini geridə qoydu

"Real Madrid" klubunun ulduz futbolçusu Kilian Mbappe UEFA Çempionlar Liqasında daha bir tarixi ana imza ataraq əfsanəvi Lionel Messinin uğurunu geridə qoyub.

Gundem.today xəbər verir ki, istedadlı hücumçu bu nəticəyə Almaniyada "Bavariya"ya qarşı keçirilən və "kral klubu"nun 3:4 hesabı ilə məğlub olduğu 1/4 final mərhələsinin gərgin cavab qarşılaşmasında fərqlənərək nail olub.

Bununla da fransalı forvard cari mövsüm qitənin ən nüfuzlu klub turnirində vurduğu qolların sayını 15-ə çatdırmağı bacarıb. Müqayisə üçün qeyd edək ki, argentinalı ulduz Messi 2011/2012 mövsümündə rəqib qapılarından 14 top keçirmişdi.

Turnirin mütləq rekordu isə hələ də portuqaliyalı ulduz Kriştianu Ronalduya məxsusdur. O, 2013/2014 mövsümündə məhz "Real Madrid"in heyətində çıxış edərkən bir mövsüm ərzində 17 dəfə rəqib qapılarına yol taparaq tarixi göstərici müəyyənləşdirib.

Xatırladaq ki, İspaniyada baş tutan ilk matçda da "Bavariya"ya 1:2 hesabı ilə məğlub olan "Real" bu nəticələrin ardından UEFA Çempionlar Liqasındakı mübarizəsini dayandıraraq turnirlə vidalaşıb.

Xəbər maraqlı gəlib? Sosial şəbəkələrdə paylaşın