MİQ imtahanlarının test mərhələsinin keçirilmə tarixi bəlli oldu

Müəllimlərin işə qəbul imtahanlarının test mərhələsinin keçirilmə tarixi açıqlandı.

Gundem.today xəbər verir ki, bu barədə Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov bu gün keçirilən brifinqdə məlumat verib.

O bildirib ki, mərhələnin iyul ayının 1-8 tarixində keçirilməsi nəzərdə tutulur:

"Müəllimlərin işə qəbulu üzrə müsabiqədə iştirakın ödənişli tətbiqinə baxmayaraq, sosial həssas kateqoriyalara aid şəxslər və bir sıra iştirakçılar üçün ödəniş tələbi tətbiq edilmir və bu qruplara xüsusi güzəşt mexanizmi müəyyən edilib.

Təqdim olunan dəyişikliklərə əsasən, müəllimlərin işə qəbulu müsabiqəsində iştirakın ödənişli olması nəzərdə tutulsa da, sosial ədalət və inklüzivlik prinsiplərinin qorunması məqsədilə müəyyən kateqoriyalara münasibətdə ödəniş tətbiq olunmur. Bu yanaşma xüsusilə sosial müdafiəyə ehtiyacı olan şəxslərin müsabiqəyə çıxış imkanlarının məhdudlaşmasının qarşısını almağa xidmət edir.

- Müsabiqədə ilk dəfə iştirak edən şəxslər;

- əlilliyi olan şəxslər;

- ünvanlı dövlət sosial yardımı alan ailələrin üzvləri;

- şəhid ailəsinin üzvləri;

- həmçinin Azərbaycan Respublikasının ərazi bütövlüyü uğrunda döyüş əməliyyatlarında iştirak etdiyinə görə "müharibə veteranı" adı almış şəxslər üçün iştirak ödəniş nəzərdə tutulmayıb.

Bu güzəşt mexanizmi dövlətin sosialyönümlü siyasətinin tərkib hissəsi olmaqla yanaşı, MİQ müsabiqəsində bərabər imkanların təmin edilməsinə, həssas qrupların əmək bazarına inteqrasiyasına və onların təhsil sistemində iştirakının stimullaşdırılmasına şərait yaradır".

Xəbər maraqlı gəlib? Sosial şəbəkələrdə paylaşın