Nəsimi rayonunda avtosalon məhəllə yolunu ZƏBT EDİB: "Qəza riski artır"

Bakının Nəsimi rayonunda yerləşən avtosalon sakinlərin həyətlərinə gedən yolda ciddi maneə yaradıb.

Bu barədə Gundem.today-a şikayət daxil olub.

Qeyd olunub ki, Hüseyn Seyidzadə və Rəşid Məmmədov küçələrinin kəsişməsində, məhəllənin girişində tikilmiş çoxmərtəbəli binanın altında fəaliyyət göstərən avtosalon ərazini, demək olar ki, tamamilə zəbt edib.

A post shared by Gundem.today (@oxuaz)

Sakinlərin sözlərinə görə, satışa çıxarılan avtomobillər məhəlləyə giriş-çıxışı ciddi şəkildə məhdudlaşdırıblar.

"Bura binaların həyətlərinə giriş və çıxış üçün nəzərdə tutulan dar, ikizolaqlı yoldur. Binanın altında avtosalon açılandan sonra o yoldan keçmək ciddi problem yaradır. Belə ki, satışda olan maşınlar yolun giriş hissəsində sağ zolaqda saxlanılır, əlavə olaraq salon əməkdaşlarının və müştərilərin avtomobilləri də ikinci zolaqda park edilir. Nəticədə, hərəkət üçün yalnız dar və təhlükəli bir zolaq qalır ki, bu da nəqliyyatın hərəkətini çətinləşdirir. Həyətdən əsas yola çıxış zamanı görünüş sahəsinin məhdud olması qəza riskini artırır, çünki sürücülərin baş yolla hərəkət edən avtomobilləri vaxtında görməsi mümkün deyil", - deyə şikayətdə vurğulanıb.

Məsələ ilə bağlı Gundem.today-a açıqlama verən Bakı Şəhər Dövlət Yol Polisi İdarəsinin (BŞDYPİ) bölmə rəisi, polis mayoru Toğrul Nəsirli bildirib ki, artıq ərazidə müvafiq tədbirlər görülüb.

"Sözügedən şikayətlə bağlı Nəsimi Rayon Polis İdarəsinin (RPİ) Dövlət Yol Polisi (DYP) Şöbəsinin əməkdaşları tərəfindən Nəsimi rayonu Rəşid Məmmədov küçəsində həyata keçirilən tədbirlər nəticəsində yolun buraxıcılıq qabiliyyətinin aşağı düşməsinə, eyni zamanda, sıxlığın yaranmasına səbəb olan nəqliyyat vasitələrinin sürücüləri barəsində qanunamüvafiq tədbirlər görülüb", - deyə T.Nəsirli bildirib.

Xəbər maraqlı gəlib? Sosial şəbəkələrdə paylaşın