Pentaqonda qalmaqal: Heqset ilə Driskoll arasında gərginlik artır

"ABŞ-nin hərb naziri Pit Heqset Donald Trampın onu vəzifədən kənarlaşdıraraq Pentaqon rəhbəri postuna quru qoşunları naziri Daniel Driskollun namizədliyini irəli sürə biləcəyindən narahatdır".

Gundem.today xəbər verir ki, bu barədə özəl mənbələrinə istinadən "The Wall Street Journal" (WSJ) qəzeti məlumat yayıb.

Nəşrdə qeyd olunub ki, Pentaqon rəhbəri uzun müddətdir ordunun gündəlik həyatı, avadanlıq tədarükü və maliyyə məsələlərinə cavabdeh olan quru qoşunları naziri ilə açıq şəkildə savaş halındadır. Belə ki, nəşrin məlumatına görə, hələ 2025-ci ilin əvvəllərində Driskoll Heqsetin otağına daxil olaraq ordu islahatlarına dair müzakirə aparmaq məqsədilə Vens və Trampın hərbçilərlə görüşünün təşkilini təklif edib.

Nazir isə Driskolla qışqırmağa başlayıb, burada əsas şəxsin özü olduğunu bildirib və ona səlahiyyət çərçivəsindən kənara çıxmamağı əmr edib.

Bu hadisədən sonra onlar arasında daha bir neçə dəfə münaqişə yaşayıb. Nümunə olaraq, Pentaqon rəhbəri Driskoll məzuniyyətdə olarkən qərargah rəisi Rendi Corcu və daha iki generalı - Devid Hadni və Uilyam Qrini vəzifələrindən azad edib.

Daha əvvəl "The Washington Post" qəzetinin verdiyi məlumata görə, Heqset Driskollu işdən çıxara bilmir və buna görə də onun həyatını "cəhənnəmə çevirməyi" planlaşdırır. Hərb naziri bu mövqeyinə görə dəfələrlə tənqidlərə məruz qalıb.

Qeyd olunub ki, noyabr ayında Tramp Driskollu Ukrayna üzrə nizamlanma nümayəndə heyətinin tərkibinə daxil edib. Sözügedən tapşırığın icrası üçün nəyə görə Heqsetin deyil, məhz Driskollun seçilməsi Pentaqon rəhbərliyində xeyli sual yaradıb. WSJ-nin mənbələrinin bildirdiyinə görə, həmin vaxt hərb naziri Ağ Evin Driskollu danışıqlardan kənarlaşdırmasını istədiyini söyləyib. Bununla belə, Pentaqon rəhbərinin ictimaiyyətlə əlaqələr üzrə köməkçisi Şon Parnell əmin edib ki, Heqset ordu naziri də daxil olmaqla, bütün silahlı qüvvələr növlərinin rəhbərləri ilə mükəmməl işgüzar münasibətlərə malikdir. Nəşrin məlumatına əsasən, Driskollun mümkün istefası halında Heqset Parnelli ordu naziri vəzifəsinə təyin etməyi planlaşdırırmış.

Xəbər maraqlı gəlib? Sosial şəbəkələrdə paylaşın