Qazaxıstanda Enrike İqlesiasın konsertində qeyri-adi məhdudiyyət tətbiq olunacaq

Dünyaşöhrətli ispaniyalı ifaçı Enrike İqlesiasın Qazaxıstanda keçirəcəyi konsert proqramı zamanı qadın pərəstişkarları öpməsinə icazə verilməyəcək.

Gundem.today xəbər verir ki, bu məhdudiyyət barədə Qazaxıstanın mədəniyyət və informasiya nazirinin müavini Kanat İskakov məlumat verib.

Nazir müavini bildirib ki, konsert zamanı qanunvericiliyə zidd addımların atılmaması üçün məsələ ciddi şəkildə dəyərləndiriləcək:

"Müğənninin pərəstişkarını səhnəyə çıxararaq onu öpməsini nəzərdə tutan şou detalları Qazaxıstan cəmiyyətinin mənəvi və etik normalarına heç bir halda uyğun gəlmir".

Xatırladaq ki, 2022-ci ilin payızında Enrike İqlesias Las-Veqasdakı çıxışı zamanı bir pərəstişkarı ilə ehtiraslı öpüşünə görə kəskin tənqid olunmuşdu. Həmin vaxt sosial şəbəkə istifadəçiləri ifaçının evdə onu gözləyən sevgilisi - rusiyalı tennisçi Anna Kurnikova və övladları olduğu halda, bu cür davranış sərgiləməsini yolverilməz hesab etmişdilər.

Maraqlıdır ki, Anna Kurnikova indiyədək sevgilisinin pərəstişkarları ilə bu cür səmimi görüntülərinə dair heç bir rəsmi münasibət bildirməyib. Qazaxıstan tərəfi isə bu cür halların təkrarlanmaması üçün konsert təşkilatçılatçılarına öncədən xəbərdarlıq edib.

Xəbər maraqlı gəlib? Sosial şəbəkələrdə paylaşın