SON DƏQİQƏ: Pentaqon hərəkətə keçdi: İranın komanda mərkəzləri hədəfə alındı - VİDEO

Mayın 7-də ABŞ Hərbi Dəniz Qüvvələrinə məxsus raket esminesləri Hörmüz boğazından Oman körfəzinə keçərkən İranın hücumlarının qarşısını alıb və özünümüdafiə məqsədilə cavab zərbələri endirib.

Gundem.today xəbər verir ki, bu barədə ABŞ Mərkəzi Komandanlığı (CENTCOM) məlumat yayıb.

Bildirilib ki, "USS Truxtun" (DDG 103), "USS Rafael Peralta" (DDG 115) və "USS Mason" (DDG 87) gəmiləri beynəlxalq dəniz dəhlizi ilə hərəkət edərkən İran qüvvələri tərəfindən çoxsaylı raketlər, pilotsuz uçuş aparatları (PUA) və kiçik qayıqlar vasitəsilə hədəfə alınıb. Hücum nəticəsində ABŞ-yə məxsus hərbi texnikaya ziyan dəyməyib.

"CENTCOM təhdidləri zərərsizləşdirərək, ABŞ qüvvələrinə edilən hücuma görə məsuliyyət daşıyan İranın hərbi obyektlərinə zərbələr endirib. Hədəfə alınan məkanlar arasında raket və dron buraxılış məntəqələri, komanda-idarəetmə mərkəzləri, həmçinin kəşfiyyat və müşahidə qovşaqları yer alıb", - deyə açıqlamada qeyd olunub.

CENTCOM münaqişənin genişlənməsini istəmədiyini, lakin ABŞ qüvvələrini müdafiə etmək üçün tam hazırlıq vəziyyətində olduğunu bəyan edib.

ABŞ silahlı qüvvələri İranın Bəndər Abbas və Minab şəhərlərinə zərbələr endirib.

Gundem.today xəbər verir ki, bu barədə məlumatı etibarlı mənbələrə istinadən "Fox News" telekanalının müxbiri Cennifer Qriffin "X" sosial şəbəkə hesabında paylaşıb.

Məlumata görə, ABŞ rəhbərliyi İran ərazisinə endirilən son zərbələrin hərbi əməliyyatların tam miqyasda yenidən başlaması kimi qiymətləndirilməməsi barədə bəyanat yayıb.

İranın hava hücumundan müdafiə (HHM) sistemləri ölkə səmasında iki pilotsuz uçuş aparatını (PUA) məhv edib.

Gundem.today "Mehr" agentliyinə istinadən xəbər verir ki, hadisə İranın cənubunda qeydə alınıb.

Bildirilib ki, Bəndər-Abbas və Qəşm şəhərləri üzərində düşmənə məxsus olduğu iddia edilən iki PUA vurularaq zərərsizləşdirilib.

Agentlik hadisənin hansı şəraitdə baş verməsi və PUA-ların mənsubiyyəti barədə əlavə təfərrüat təqdim etməyib.

07 may, 23:36

Bəndər-Abbas şəhərinin ətrafında partlayış səsləri eşidilib.

Gundem.today xəbər verir ki, bu barədə məlumatı "Fars" xəbər agentliyi yayıb.

Məlumata görə, yerli sakinlər şəhərin müxtəlif istiqamətlərindən gələn və partlayışı xatırladan güclü səslər eşitdiklərini bildiriblər. Agentlik qeyd edib ki, hazırda həmin səslərin dəqiq mənbəyi və səbəbi araşdırılır.

Bununla yanaşı, "Mehr" agentliyi Qəşm adasında da oxşar səslərin qeydə alındığını bildirib.

Hazırda məsələ ilə bağlı araşdırmalar davam etdirilir.

Xəbər maraqlı gəlib? Sosial şəbəkələrdə paylaşın