Vahan Kostanyan: "İrəvan və Bakı sülh müqaviləsinin imzalanması üçün çalışacaqlar"

"Bakı və İrəvan arasında sülh müqaviləsi artıq razılaşdırılıb və Ermənistan tərəfi azərbaycanlı həmkarları ilə birgə onun imzalanması və yekun ratifikasiyası üzərində çalışacaq".

Gundem.today "Report"a istinadən xəbər verir ki, bu barədə Ermənistanın xarici işlər nazirinin müavini Vahan Kostanyan azərbaycanlı jurnalistlərə bildirib.

"Ermənistan və Azərbaycan artıq sülh şəraitindədir. Sazişin imzalanması barədə isə bildiyiniz kimi, sənəd paraflanıb və azərbaycanlı həmkarlarımızla birlikdə onun imzalanması və yekun ratifikasiyası üzərində işləyəcəyik", - Kostanyan bildirib.

O əlavə edib ki, Ermənistan və Azərbaycan regionda kommunikasiyaların qarşılıqlı əsasda açılması ilə bağlı artıq siyasi öhdəlik götürüblər.

"Biz hazırda bu istiqamətdə işləyirik", - o qeyd edib.

İyunda keçiriləcək parlament seçkisindən danışan Kostanyan qeyd edib ki, bu, əslində, Ermənistanda sülh şəraitində keçiriləcək ilk seçkidir.

"Və mən hesab edirəm ki, Ermənistan xalqı sülh gündəliyini tamamilə dəstəkləyir", - o deyib.

Ermənistanın baş naziri Nikol Paşinyanın Antalya Diplomatiya Forumunda iştirak etməməsi ilə bağlı sualı cavablandıran Kostanyan bunu ölkə daxilindəki siyasi vəziyyətlə izah edib.

"Ölkə daxilində kifayət qədər gərgin siyasi vəziyyət var və bu gün baş nazir parlamentin iclasında iştirak edib", - o bildirib.

Xəbər maraqlı gəlib? Sosial şəbəkələrdə paylaşın