Antarktidada sensasion kəşf: İki milyon illik buz izinə rast gəlindi

Rusiya tədqiqatçıları Antarktida qitəsində, Vostok stansiyasının yaxınlığında yaşı təqribən 2 milyon ilə çatan ən qədim buz qatının mövcud ola biləcəyi zonanı aşkar ediblər.

Gundem.today xəbər verir ki, bu barədə məlumatı TASS-a Arktika və Antarktika Elmi-Tədqiqat İnstitutunun rəhbəri Aleksandr Makarov verib.

Onun sözlərinə görə, Vostok stansiyası ərazisində artıq yaşı bir milyon ildən çox olan buz nümunələri çıxarılıb. Bu tapıntılar planetimizin iqlim keçmişi haqqında mühüm məlumatlar ehtiva edir. Mütəxəssislərin fikrincə, stansiyadan 300 kilometr məsafədə yerləşən və "B günbəzi" adlandırılan ərazidə 1.5-2 milyon illik daha qədim buzların olması ehtimal edilir. Həmin nümunələr qədim dövrlərdə iqlimin necə dəyişdiyini araşdırmağa imkan verəcək.

Makarov qeyd edib ki, əldə olunacaq bu nümunələr vasitəsilə bir milyon ildən də əvvəlki dövrə aid atmosferin tərkibini və temperatur fərqlərini müəyyən etmək mümkün olacaq. Toplanan məlumatlar gələcəkdə Yer kürəsində baş verə biləcək proseslərin proqnozlaşdırılması və modelləşdirilməsinə dəstək verəcək.

İnstitut rəhbərinin bildirdiyinə görə, layihə tam təsdiqləndikdən və maliyyə ayrıldıqdan sonra qədim buz qatının axtarışı məqsədilə xüsusi ekspedisiya təşkil ediləcək.

Alimlər eyni zamanda Antarktidanın ən iri buzaltı su hövzəsi sayılan Vostok gölünü tədqiq etməyə hazırlaşırlar. Bunun üçün gölün ekosisteminə müasir çirkləndirici təsirlər buraxmadan su və qaya nümunələrinin götürülməsinə imkan verən tam "təmiz" daxilolma texnologiyasına ehtiyac var. Lakin hazırda belə bir innovasiya hələ mövcud deyil.

Vostok gölü təqribən 4 min metr qalınlığında buz qatının altında yerləşir. Onun uzunluğu 250 kilometr, eni 50 kilometr, dərinliyi isə 750 metrdir. Ümumi sahəsi 20 min kvadrat kilometrə yaxın olan bu su hövzəsində həyat üçün əlverişli şəraitin və müxtəlif canlı orqanizmlərin mövcudluğu ehtimal edilir.

Xəbər maraqlı gəlib? Sosial şəbəkələrdə paylaşın