"Arsenal" rəhbərliyi Mikel Artetanın qarşısına şərt qoydu

"Arsenal" klubunun rəhbərliyi komandanın baş məşqçisi Mikel Artetanın qarşısına qəti və həlledici şərt qoyub.

Gundem.today-ın "The Touchline" nəşrinə istinadən yaydığı məlumata görə, London təmsilçisi FA Kubokunun 1/4 final mərhələsində "Sauthempton"a məğlub olsa da, klub rəhbərliyi hələlik ispaniyalı mütəxəssisə olan etibarını qoruyub saxlayır.

Rəhbərlik Çempionşip təmsilçisinə qarşı alınan məğlubiyyəti əsl fiasko kimi qiymətləndirir. Buna baxmayaraq, uğursuzluq Artetanın dərhal istefaya göndərilməsi üçün yetərli səbəb sayılmır. İdarə heyəti hazırkı baş məşqçini klubun uzunmüddətli inkişaf layihəsi üçün ən doğru seçim hesab edir. Lakin mütəxəssisin "Arsenal"dakı gələcək karyerası birbaşa cari mövsümün yekun nəticələrinə bağlı olacaq.

Qeyd edək ki, hazırkı vəziyyətdə "Arsenal" həm İngiltərə Premyer Liqasının turnir cədvəlinə başçılıq edir, həm də Çempionlar Liqasında mübarizəsini davam etdirir. "Topçular"ın rəhbərliyi komandanın bu iki nüfuzlu kubokdan ən azı birini qazanacağına böyük ümid bəsləyir. Əgər onların gözlədiyi bu ssenari həyata keçməzsə, Mikel Arteta tutduğu vəzifədən azad ediləcək.

Xəbər maraqlı gəlib? Sosial şəbəkələrdə paylaşın