Donald Tramp: "Dəniz blokadası ləğv edilərsə, İranla razılaşma olmayacaq"

Amerika Birləşmiş Ştatlarının Prezidenti Donald Tramp aprelin 21-də verdiyi açıqlamada dəniz blokadası aradan qaldırılarsa, İranla müqavilə bağlamağın mümkünsüz olacağını vurğulayıb.

Gundem.today xəbər verir ki, bu barədə Ağ Ev lideri "Truth Social" platformasında bildirib.

Onun sözlərinə görə, rəsmi Tehran Hörmüz boğazının yenidən açılmasında maraqlıdır, çünki ölkə neft satışından hər gün 500 milyon dollar zərər edir.

"Dörd gün əvvəl mənə yaxınlaşaraq bildirdilər ki, İran boğazın dərhal açılmasını tələb edir. Lakin biz bu addımı atsaq, rəhbərləri də daxil olmaqla onların ölkəsinin qalan hissəsini məhv etməyincə, heç vaxt İranla razılaşma əldə edə bilməyəcəyik", - deyə ABŞ prezidenti "Truth Social" platformasında qeyd edib.

Aprelin 21-də İran parlamentinin deputatı Əhməd Naderi isə bildirib ki, Vaşinqton dəniz blokadasına son qoymayana qədər Tehran ABŞ ilə yeni danışıqlar mərhələsinə başlamayacaq. Eyni gündə İranın xarici işlər naziri Abbas Əraqçı çıxış edərək, İran limanlarına tətbiq edilən blokadanın atəşkəs rejiminin pozulması demək olduğunu bəyan edib.

Xəbər maraqlı gəlib? Sosial şəbəkələrdə paylaşın