İsrail Livanın cənubunda atəşə hazır raket qurğusunu məhv etdi

İsrail hökuməti Livanın cənub bölgəsində atəş üçün tam hazır vəziyyətdə olan raket qurğusunu vurduğunu açıqlayıb.

Gundem.today xəbər verir ki, bu barədə İsrail Müdafiə Qüvvələrinin (SAXAL) Mətbuat Xidməti yerli telekanallara məlumat yayıb.

"Ölkənin şimal hissəsindəki mülki yaşayış məntəqələrinə yaranan ani təhlükənin qarşısını almaq məqsədilə SAXAL gecə saatlarında Livanın cənubunda döyüşə hazır vəziyyətdəki raket sisteminə zərbə endirib. Bu hərbi qurğu həm hərbçilərimizə, həm də vətəndaşlarımıza qarşı ciddi təhdid yaradırdı. Edilən hücum bu təhlükənin tamamilə aradan qaldırılmasına yönəlmişdi", - deyə İsrail Müdafiə Qüvvələrinin sözçüsü bildirib.

Qurumdan o da əlavə olunub ki, SAXAL ölkənin dinc əhalisinə və ordusuna qarşı yönələn istənilən riskin zərərsizləşdirilməsi istiqamətində lazımi tədbirləri görməkdə davam edəcək.

Xəbər maraqlı gəlib? Sosial şəbəkələrdə paylaşın