Təbiəti necə qoruyuruq? - Real fayda, yoxsa sadəcə görüntü?

Ekoloji meyillərin geniş yayılmasına baxmayaraq, gündəlik həyata tətbiq edilən vərdişlərin heç də hamısı gözlənilən real səmərəni təmin etmir.

Gundem.today xəbər verir ki, bu mövzu ilə bağlı kimyaçı və elmi jurnalist Səkinə Zeynalova "İzvestiya" nəşrinə müsahibəsində maraqlı faktlar açıqlayıb. Ekspertin fikrincə, yaşam tərzində qlobal və çətin dəyişikliklər etmədən belə təbiətə fayda vermək mümkündür.

O vurğulayıb ki, alış-veriş zamanı doğru qərarlar vermək, çoxdəfəlik qablardan və su filtrlərindən yararlanmaq, eləcə də yerli istehsal olan mallara üstünlük vermək xüsusi önəm daşıyır. Mütəxəssisin sözlərinə görə, ən effektiv üsullardan biri avtomobillə edilən gərəksiz gəzintilərdən uzaq durmaqdır. Yaxın məsafələrə piyada getmək və ya velosipeddən istifadə etmək atmosferə atılan zərərli tullantıları əhəmiyyətli dərəcədə azaldır.

S.Zeynalova xatırladıb ki, çoxdəfəlik əşyalar yalnız müntəzəm istifadə olunduqda müsbət nəticə verir, əks halda bu, sadəcə "ekoloji imitasiya"dır. Yerli məhsulların alınması isə həm təbii ehtiyatlara qənaət edir, həm də logistika xərclərini minimuma endirir. O, eyni zamanda, plastik tullantıların çeşidlənərək atılmasının zəruriliyini də diqqətə çatdırıb.

Mütəxəssis əlavə edib ki, müvafiq infrastruktur mükəmməl olmasa belə, cəmiyyətin bu istiqamətdəki tələbatı həlledici amildir. Məişət tullantılarının ev şəraitində ayrılması, elektrik enerjisi və suyun qənaətlə işlədilməsi cəmiyyətdə sağlam ekoloji şüurun yaranmasına təkan verir.

Xəbər maraqlı gəlib? Sosial şəbəkələrdə paylaşın