WSJ: "İran Trampın tələbinə boyun əyməyəcək"

İran ABŞ prezidenti Donald Trampın Hörmüz boğazının aprelin 7-si saat 20:00-a (Bakı vaxtı ilə 8 aprel, 05:00 - red.) qədər açılması ilə bağlı tələbinə boyun əyməyəcək.

Gundem.today xəbər verir ki, bu barədə "The Wall Street Journal" (WSJ) nəşri öz mənbələrinə istinadən məlumat yayıb.

Məqalə müəllifləri vurğulayıblar ki, Tramp ikinci prezidentlik müddətində İranla razılaşma əldə etmək üçün iki dəfə son tarix müəyyənləşdirib, ölkə rəhbərliyinin şərtləri yerinə yetirməyəcəyi təqdirdə hücuma keçəcəyini bildirib və ardınca hərbi əməliyyatlar başlayıb.

"Hazırda ABŞ-nin vitse-prezidenti Cey Di Vensdən tutmuş Yaxın Şərqin kəşfiyyat xidmətlərinin rəhbərlərinə qədər hər kəs yekun addımın - atəşkəsin əldə olunmasına çalışsa da, İran rəsmiləri vasitəçilərə eyni ssenarinin təkrarlanacağını gözlədiklərini bildirirlər", - nəşrdə qeyd olunub.

Bəzi amerikalı məmurların sözlərinə görə, ABŞ və İranın mövqeləri arasındakı uçurum Ağ Ev liderinin müəyyən etdiyi son tarixə qədər aradan qaldırıla bilməyəcək dərəcədə böyükdür. Bununla yanaşı, Tehran rəsmiləri vasitəçilərə ABŞ-nin İslam Respublikasına qarşı hücumlarının davam edəcəyini düşündüklərini çatdırıblar. Həmçinin, onların fikrincə, ABŞ ilə danışıqlarda irəliləyiş qeydə alınsa belə, İsrail yüksəkrütbəli İran rəsmilərini məhv etmək məqsədilə hava zərbələrini davam etdirəcək.

Xəbər maraqlı gəlib? Sosial şəbəkələrdə paylaşın