Azarkeşlərin intizamsızlığı səbəbindən "Neftçi" və "Qarabağ" cərimələndi

"Neftçi" klubu azarkeşlərinin intizamsızlığına görə ümumilikdə 13 min manat məbləğində cərimə ilə üzləşib.

Gundem.today xəbər verir ki, bu ağır cəzaya Misli Premyer Liqasının 29-cu turu çərçivəsində baş tutan gərgin "Qarabağ" - "Neftçi" qarşılaşmasında qeydə alınan xoşagəlməz hadisələr əsas səbəb kimi göstərilib.

Görüşün sonunda, 90+3-cü dəqiqəsində paytaxt klubunun tərəfdarları meydançaya kənar əşyalar ataraq oyuna müdaxilə ediblər. Cari mövsüm ərzində eyni halın artıq altıncı dəfə təkrarlanması səbəbindən "ağ-qaralar" 5 000 manat məbləğində cərimə ödəməli olacaqlar.

Məsələ bununla da yekunlaşmayıb. Tribunalardakı fanatların kütləvi şəkildə təxribat xarakterli və təhqiramiz şüarlar səsləndirməsi sevimli klublarını daha 8 000 manat ziyana salıb. Qeyd edək ki, bu növ intizamsızlıq mövsüm ərzində artıq səkkizinci dəfədir ki, qeydə alınır.

Rəqib komanda "Qarabağ" da cəzasız qalmayıb. Belə ki, Ağdam təmsilçisi öz azarkeşlərinin stadionda pirotexniki vasitələrdən istifadə etməsinə görə 7 000 manat məbləğində cərimə olunub.

Xəbər maraqlı gəlib? Sosial şəbəkələrdə paylaşın