Azərbaycanın tətbiq etdiyi model dünya orduları tərəfindən öyrənilir - VİDEO

Müasir müharibələrin xarakteri köklü şəkildə dəyişib. Artıq döyüş meydanında üstünlük tank və canlı qüvvədən çox, texnologiyanın səviyyəsi ilə müəyyən olunur. Bu dəyişimin mərkəzində isə pilotsuz uçuş aparatları, yəni dronlar dayanır.

Gundem.today xəbər verir ki, bu barədə Baku TV-nin videomaterialında bildirilib.

Son illərdə baş verən hərbi qarşıdurmalar, İranla ABŞ və İsrail arasında gərginlik açıq şəkildə göstərir ki, dronlar müasir döyüşlərin əsas zərbə və idarəetmə vasitəsinə çevrilib.

Ukraynada pilotsuz sistemlər yalnız hücum üçün deyil, eyni zamanda kəşfiyyat, artilleriya korreksiyası və əməliyyatların koordinasiyası üçün geniş istifadə olunur. Yaxın Şərqdə isə İranın kütləvi kamikadze dron strategiyası Hava Hücumundan Müdafiə sistemlərini yormaq və zəiflətmək məqsədi daşıyır.

Bu yeni müharibə modelinin praktik tətbiqi ilk dəfə məhz Azərbaycan tərəfindən həyata keçirilib. 2020-ci ildə Vətən müharibəsi zamanı Azərbaycan Ordusu pilotsuz uçuş aparatlarından genişmiqyaslı və sistemli şəkildə istifadə edərək döyüşlərin gedişatını dəyişib. Bu isə sadəcə, texniki üstünlük deyil, müharibə konsepsiyasının köklü şəkildə dəyişməsi idi. Azərbaycanın tətbiq etdiyi modelin əsas fərqi ondan ibarət idi ki, dronlar ayrı-ayrılıqda deyil, vahid sistem daxilində koordinasiya olunmuş şəkildə istifadə edilirdi.

Kəşfiyyat dronları hədəfləri müəyyənləşdirir, zərbə dronları dəqiq məhvetmə funksiyasını yerinə yetirir, digər vasitələr isə düşmənin hava müdafiə sistemlərini ifşa edirdi. Beləliklə, döyüş meydanında real vaxt rejimində işləyən, bir-birini tamamlayan kompleks texnoloji şəbəkə formalaşdırılmışdı. Bu yanaşma sonradan digər müharibələrdə də tətbiq olunmağa başladı.

Bu gün Yaxın Şərqdə istifadə olunan bir çox taktiki elementlər məhz bu modelin inkişaf etdirilmiş forması kimi qiymətləndirilir. Nəticədə, Azərbaycan yalnız hərbi qələbə qazanmadı, eyni zamanda müasir müharibələrin yeni standartını müəyyənləşdirdi.

Ekspertlərin fikrincə, bu təcrübə hələ uzun illər dünya hərb elmi tərəfindən öyrəniləcək və inkişaf etdiriləcək. Çünki artıq müharibələrin taleyini silahın sayı yox, texnologiyanın ağıllı inteqrasiyası həll edir.

Xəbər maraqlı gəlib? Sosial şəbəkələrdə paylaşın