Harada ev almaq daha böyük qazanc vəd edir? - Bakının rayonları üzrə QİYMƏT ARTIMI templəri - CƏDVƏL

2026-cı ilin yanvar-mart aylarında Bakıda mənzil bazarında mərhələli və sabit artım trendi formalaşıb.

Bu barədə Gundem.today-a Azərbaycan Qiymətləndiricilər Cəmiyyətindən (AQC) məlumat verilib.

Qeyd olunub ki, birinci rübdə yeni tikililərdə qiymətlər orta hesabla 3.6%, köhnə tikililərdə təxminən 2.4%, inşası davam edən layihələrdə isə (kotlovan) 4% civarında artıb:

"Bu dinamika göstərir ki, bazarın əsas hərəkətverici seqmenti yenə də yeni tikililər və ilkin satış mərhələsində olan layihələrdir. İnvestor marağı, tikinti xərclərinin artması və yeni layihələrin məhdudluğu bu seqmentlərdə qiymət artımını daha sürətli edir.

Paytaxtda Səbail, Yasamal və Nəsimi rayonları ən yüksək artım tempinə malik zonalar olub. Nərimanov və Xətai, Nizami, Binəqədi rayonları sabit və yüksək likvidliyə malik orta seqment bazarı hesab olunur. Suraxanı, Sabunçu, Qaradağ, Pirallahı və qismən Xəzər rayonları inkişaf edən, lakin qiymət artımı tempinin daha aşağı olduğu periferik bazarlar kimi qeydə alınıb.

Mövcud dinamika göstərir ki, 2026-cı ilin ilk rübündə Bakı daşınmaz əmlak bazarı kəskin sıçrayış deyil, sabit və idarəolunan artım mərhələsindədir.

Bu tendensiya davam edərsə, ilin sonunda bazarda yeni tikililərdə 11-16%, köhnə tikililərdə 6-8%, kotlovan layihələrində isə 13-18% civarında qiymət artımı formalaşa bilər.

Bu isə onu göstərir ki, Bakı daşınmaz əmlak bazarı həm investisiya, həm də yaşayış məqsədli alıcılar üçün regionun ən stabil və perspektivli bazarlarından biri olaraq qalır".

Qurumdan o da bildirilib ki, ötən ay Bakının inzibati rayonları üzrə kirayə mənzil bazarında da qiymətlərdə ümumi artım tendensiyası müşahidə olunub:

"Fevral ayı ilə müqayisədə həm yeni tikili, həm də köhnə tikili mənzillərdə qiymət artımı qeydə alınıb.

Yeni tikili mənzillər üzrə artım 0.5%-1.1% intervalında dəyişir. Ən yüksək artım Səbail rayonunda (1.1%) olub, Yasamal, Nizami və Nəsimi rayonlarında isə təxminən 1% təşkil edib.

Köhnə tikili mənzillərdə artım 0.4%-0.9% aralığında dəyişib. Ən yüksək artım Səbail rayonunda (0.9%), ən aşağı isə Pirallahı rayonunda (0.4%) qeydə alınıb.

Ümumilikdə, yeni tikililərdə artım tempi daha yüksəkdir və mərkəzi rayonlarda qiymət artımı daha sürətlidir.

Bundan başqa, Bakı daşınmaz əmlak bazarının mart ayı üzrə statistik mənzərəsi, müxtəlif seqmentlər arasında həm qiymət artımı, həm də aktivlərin nağd vəsaitə çevrilmə sürəti baxımından kəskin disproporsiyaların mövcudluğunu nümayiş etdirir.

Azərbaycan Qiymətləndiricilər Palatasından (AQP) isə Gundem.today-a verilən məlumata görə, paytaxtın yaşayış fondunda ən yüksək rentabellilik və dövriyyə göstəriciləri məhz kütləvi yaşayış seqmentində cəmləşib. Bu sahədə orta bazar dəyərinin bir kvadratmetr üçün 2 050 manat səviyyəsində qərarlaşması, eyni zamanda illik müqayisədə qeydə alınan 7%-lik artım alıcı marağının mərkəzləşmiş trayektoriyasını müəyyən edir:

"Sözügedən mənzillərin satış dövriyyəsinin cəmi 45-60 gün çərçivəsində tamamlanması və ticarət zamanı güzəşt limitinin 3-5 %-i keçməməsi, bu aktivlərin hazırkı iqtisadi konyunkturada ən yüksək likvidlik dərəcəsinə malik olduğunu isbatlayır.

Paralel olaraq, şəhərin genişlənmə zonalarında qiymət diapazonunun 1 700-2 200 manat arasında formalaşması və bahalaşma tempinin 9-10%-ə çatması müşahidə edilsə də burada satış prosesinin 60-90 gün intervalına uzanması bazar iştirakçılarından daha səbirli yanaşma tələb edir. Köhnə tikili bazarı isə median qiymətin 2 150 manat ətrafında stabilləşməsi və 5-6%-lik diskont dərəcəsi ilə orta likvidlik zonasında mövqeyini qorumaqdadır".

Bildirilib ki, daha yüksək kapital tutumlu premium seqmentdə isə mənzərə tamamilə fərqlidir. Burada kvadratmetr üzrə median qiymətlər 3 600-4 200 manat təşkil etdiyi halda, zəif qiymət artımı (2-3%) və satış müddətinin 150 günə qədər ləngiməsi tələbin məhdudluğunu göstərir:

"Ən mürəkkəb realizasiya mühiti hazırda torpaq bazarında hökm sürür ki, burada bir sotun qiyməti 120-180 manat civarında dəyişməklə yanaşı, illik 11 %-lik yüksək bahalaşma indeksi nümayiş etdirir.

Lakin bu artım göstəricisi likvidlik defisiti ilə müşayiət olunur. Satışın reallaşma müddətinin yarım ilə qədər (180 gün) uzanması və sövdələşmələrdə 20%-ə çatan diskont zərurəti, torpaq aktivlərinin cari dövrdə ən passiv investisiya alətinə çevrildiyini ortaya qoyur".

Əlavə edilib ki, bu kompleks təhlil Bakıdakı daşınmaz əmlak əməliyyatlarında sürətin birbaşa qiymət əlçatanlığı və hədəf kütləsinin miqyası ilə bağlı olduğunu bir daha təsdiqləyir.

Xəbər maraqlı gəlib? Sosial şəbəkələrdə paylaşın