Yaxın Şərqdə gərginlik fonunda neft qiymətlərinin artması Azərbaycan üçün hansı təsirləri yaradır?

"Yaxın Şərqdə geosiyasi gərginlik fonunda neft qiymətlərinin artması Azərbaycan iqtisadiyyatı üçün çoxşaxəli təsirlər yaradır. Bu təsirlər həm müsbət imkanlar, həm də müəyyən çağırışlarla müşayiət olunur".

Bu sözləri Gundem.today-a açıqlamasında iqtisadçı Aslan Əzimzadə deyib.

O bildirib ki, Azərbaycanın əsas ixrac məhsulu olan "Azeri Light" neftinin qiymətinin yüksəlməsi, ölkəyə daxil olan valyuta axınını artırıb, dövlət büdcəsinin və Dövlət Neft Fondunun gəlirlərini genişləndirib:

"Bu isə sosial proqramların maliyyələşdirilməsi, infrastruktur layihələrinin həyata keçirilməsi və makroiqtisadi proporsionallığın qorunması baxımından əlavə imkanlar yaradır. Bununla yanaşı, neft bazarlarındakı qiymət dəyişikliklərinin yalnız iqtisadi deyil, həm də sosial faktorlarla şərtlənməsi bəzi qeyri-müəyyənliklər də yaratmaqdadır. Beynəlxalq münasibətlərdəki gərginliklər qiymətlərin qısamüddətli dövrdə artımına səbəb olsa da, vəziyyətin sabitləşməsi ilə yenidən enməsi ehtimalı yüksək olaraq qalır. Bu isə gəlirlərin davamlılığı baxımından ehtiyatlı yanaşmanı zəruri edir.

Digər tərəfdən, yüksək neft gəlirləri iqtisadi strukturun balanslı inkişafı məsləsini gündəmə gətirir. Qeyri-neft sektorunun gücləndirilməsi, iqtisadiyyatın şaxələndirilməsi və rəqabət qabiliyyətinin artırılması uzunmüddətli dayanıqlılıq üçün əsas priortetlər kimi çıxış edir. Bu baxımdan, mövcud şərait əlavə maliyyə resurslarının daha səmərli və starteji istiqamətlərə yönəldilməsi üçün imkan yaradır. Nəticə etibarilə, demək lazımdır ki, Yaxın Şərqdə baş verən proseslər fonunda neftin bahalaşması Azərbaycan üçün qısamüddətli dövrdə iqtisadi üstünlüklər təmin etsə də, bu üstünlüklərin davamlı nəticələrə çevrilməsi üçün daha strateji iqtisadi inkişaf strategiyasının həyata keçirilməsi mütərəqqi idarəetmə mexanizminin başlıca istqamətlərindən biri kimi çıxış edə bilər", - deyə ekspert vurğulayıb.

Xəbər maraqlı gəlib? Sosial şəbəkələrdə paylaşın