Əsrlərlə gizli qalan şah əsər: "Məryəm Maqdalena"nın əsl müəllifi kimdir?

Böyük Britaniyada məşhur İntibah dövrü rəssamı Rafael Santinin fırçasına aid olduğu ehtimal edilən "Məryəm Maqdalena" tablosu aşkar edilib.

Gundem.today xəbər verir ki, bu barədə "rg.ru" saytı məlumat yayıb.

Uzun illər boyu Florensiyadakı Palatina Qalereyasında saxlanılan və Pietro Perucinoya aid edilən eyniadlı əsərin müəllifliyi artıq sual altındadır. İngiltərədə tapılan tablo yanlış müəllif göstərilməsi və sonradan edilən texniki müdaxilələr səbəbindən əsrlərlə diqqətdən kənarda qalıb.

"Open Science" platformasında yayımlanan araşdırmalar nəticəsində məlum olub ki, əsərin alt qatında orijinal taxta əsas gizlənib. Mütəxəssislər müəllifi müəyyənləşdirmək üçün kimyəvi-fiziki analizlər və arxiv sənədlərini paralel şəkildə araşdırıblar. Məlum olub ki, Urbino hersoqlarının arxivlərində II Françesko Mariya della Roverenin ölümündən sonra itmiş "Məryəm Maqdalena" əsəri barədə qeydlər mövcuddur.

İnfraqırmızı analizlər İngiltərədəki tabloda ilkin eskiz dəyişikliklərinin (rəssamın iş prosesində etdiyi düzəlişlər) olduğunu göstərib. Florensiyada saxlanılan versiyada isə belə izlərə rast gəlinmir ki, bu da onun sadəcə nüsxə ola biləcəyi ehtimalını artırır. Bundan əlavə:

Boya qatları: Britaniya versiyasında boya qatları daha incə və zərifdir.

Fırça izləri: Florensiya nümunəsində fırça izləri daha sərtdir.

Kompozisiya: İngiltərə versiyasında geyim örtüyü qol xəttini təbii izləyir, Florensiya rəsmi isə daha qeyri-dəqiq işlənib.

Həmçinin tablodakı "S. Maria Madalena" yazısının klassik latın dilində deyil, o dövrün danışıq dilində olması əsərin daha sonrakı dövrdə yaradıldığı (nüsxə olduğu) ehtimalını gücləndirir.

Alimlərin gəldiyi nəticələr rəsmən təsdiqlənərsə, bu kəşf Rafael Santinin sənət irsinin yenidən qiymətləndirilməsinə və dünya muzeylərindəki bəzi eksponatların müəllifliyinə yenidən baxılmasına səbəb olacaq.

Xəbər maraqlı gəlib? Sosial şəbəkələrdə paylaşın