Yaxın Şərqdəki gərginliyin neft ixracına vurduğu zərbə - FOTO

İraq, Küveyt, Oman, Qətər, Səudiyyə Ərəbistanı və Birləşmiş Ərəb Əmirliklərindən (BƏƏ) ixracat 469 milyon bareldən (fevral) 263 milyon (mart) barelə düşüb, yəni ixracatda 206 milyon barel və ya 44 faiz azalma müşahidə olunub.

Gundem.today xəbər verir ki, bu barədə "Al Jazeera" məqalə dərc edib.

Məqalədə bildirilib ki, azalma sürətli, lakin altı ölkə arasında fərqli nisbətlərdə baş verib. Limanlarının coğrafi mövqeyi və alternativ boru kəməri imkanlarından asılı olaraq bəzi dövlətlər digərləri ilə müqayisədə daha çox zərər görüb.

Bəs hansı neft hasilatçıları daha çox zərər çəkib? Müəllifin sözlərinə görə, ən ağır zərbə İraqa dəyib. Belə ki, İraqda ixracat 82 faiz azalaraq 94 milyon bareldən (fevral) 17 milyon barelə (mart) qədər geriləyib. Məlumata görə, Küveyt və Qətər neft tədarükünün təxminən dörddəüçünü itirib və müvafiq olaraq 75 və 70 faiz azalma ilə üzləşib. Səudiyyə Ərəbistanı və BƏƏ daha az - müvafiq olaraq 34 və 26 faizlik geriləmə ilə vəziyyətdən çıxa bilib. Bu nəticə qismən Hörmüz boğazından yan keçən boru kəmərləri və üzən anbarlar hesabına əldə olunub. Yeganə istisna isə Oman dövləti olub. Buna səbəb isə bu ölkənin bir çox limanlarının boğazdan kənarda yerləşməsi olub. Digər ölkələrdən fərqli olaraq Omanın ixracatı 16 faiz artaraq 25 milyon bareldən 29 milyon barelə yüksəlib, lakin bu, ümumi kəsiri yalnız cüzi miqdarda ödəməyə kömək edib.

Müəllif qeyd edir ki, qlobal etalon kimi Böyük Britaniya və Norveç arasında, Şimal dənizində hasil edilən "Brent" markalı neftdən istifadə olunur. ABŞ etalonu olaraq isə Texasda çıxarılan "West Texas Intermediate" (WTI) nefti götürülür. Neft qlobal əmtəə kimi ticarət olunur. Yəni hər hansı bir fasilə ölkənin nefti faktiki haradan almasından asılı olmayaraq, zəncirvari reaksiya verə bilər. Müharibənin əsas hissəsində neftin qiyməti barel üçün 100 dolları ötüb və aprelin 2-də təqribən 128 dollar olmaqla pik həddə çatıb. Fevralın 28-də, ABŞ-İsrailin İrana qarşı müharibəsi başlamazdan əvvəl "Brent" markalı neftin orta qiyməti bir barel üçün təqribən 65 dollar təşkil edirdi.

Xəbər maraqlı gəlib? Sosial şəbəkələrdə paylaşın