Paşinyan yenə Rusiyaya gedəcək

Ermənistan və Rusiya arasında yeni yüksəksəviyyəli görüş 2026-cı ilin iyun ayının ikinci yarısında planlaşdırılır.

Gundem.today xəbər verir ki, bu barədə baş nazir Nikol Paşinyan brifinq zamanı bildirib. Onun sözlərinə görə, Moskvaya son səfəri zamanı rəsmi danışıqlardan əlavə, o, Rusiya Prezidenti Vladimir Putinlə işgüzar nahar da edib. Paşinyan söhbətin dostluq atmosferində keçdiyini qeyd edib.

"Dediyim kimi, səfəri çox uğurlu qiymətləndirirəm. Hər kəs öz fikirlərini bildirməkdə sərbəstdir. Təkbətək görüşə gəldikdə isə, biz artıq iyunun ikinci yarısında yüksək səviyyəli görüş də daxil olmaqla, gələcək əlaqələr və tədbirlər barədə razılığa gəlmişik", - deyə baş nazir bildirib. Baş nazir qeyd edib ki, görüş zamanı müzakirə olunan məsələlər əvvəllər müxtəlif məkanlarda açıq şəkildə müzakirə olunub.

"Ermənistan-Rusiya münasibətləri hazırda transformasiya mərhələsindədir və mən bu prosesə müsbət baxıram. Biz qarşılıqlı əlaqəmizi dostluq dialoqu çərçivəsində davam etdirmək niyyətindəyik", - deyə Paşinyan bildirib. Baş nazir, həmçinin Ermənistanın Avrasiya İqtisadi İttifaqı (Aİİ) və Avropa İttifaqı (Aİ) ilə qarşılıqlı əlaqəyə yanaşmasını şərh edərək, bu məsələ ilə bağlı əvvəllər öz fikirlərini bildirdiyini xatırladıb. Onun sözlərinə görə, hər iki təşkilata qarşı siyasəti birləşdirmək mümkün olduğu müddətcə Ermənistan bu kursu davam etdirmək niyyətindədir. Uyğunsuzluq yaranarsa, qərar ölkə vətəndaşları ilə birlikdə veriləcək. "Həmin an gələnə qədər əlavə şərh verməyə ehtiyac görmürəm", - deyə Paşinyan qeyd edib.

Xatırladaq ki, Ermənistanın baş naziri Nikol Paşinyan sonuncu dəfə aprelin 1-də Moskvaya işgüzar səfər edib.

Xəbər maraqlı gəlib? Sosial şəbəkələrdə paylaşın